Fólkaflokkurin hevur løtt kanónirnar til fólkatingsvalið. Valevnislistin varð kunngjørdur hósdagin á Gamla Apoteki.
Formaðurin Óli Breckmann, ið hevur havt sæti á Fólkatingi síðan 1984, legði valuppleggið hjá flokkinum fyri fjølmiðlarnar. Hann legði dent á, at Fólkaflokkurin fór at leggja seg eftir at føra hóvligan politikk í sambandi við sjálvstýristilgongdina, ið byggir á føroyskt sjálvstýri við skili. Hann setti hetta upp ímóti politikki Tjóðveldisfloksins, ið søkir samanbrestir við donsku stjórnina. Hann legði afturat, at tað er umráðandi at hava góð viðurskifti við Danmark.
Eftir at Tjóðveldisflokkurin legði sítt valupplegg fram týsdagin kennir Fólkaflokkurin seg hóttan av samgongufelaganum. Óli Breckmann vildi vera við, at Tjóðveldisflokkurin fer eftir umboðnum hjá Fólkaflokkinum, og tí væntar hann, at stríðið fer at standa millum hesar báðar flokkar um tað eina umboðið, meðan Sambandsflokkurin og Javnaðarflokkurin fóru at berjast um hitt.
Tveir av hinum flokkunum hava sagt, at teir fara at halda seg uttanfyri danskan innanríkispolitikk, men Fólkaflokkurin fer framhaldandi at halda seg til tann borgarliga vongin í Fólkatinginum.
Fólkafloksmenn sláa fast, at tað ber ikki til at halda seg uttanfyri danskan politikk, um tú verður valdur inn á Fólkating. Tí kunnu Javnaðar- og Tjóðveldisflokkurin ikki boða frá, at teir fara at halda seg uttanfyri.
Í valupplegginum fer Fólkaflokkurin leggja seg eftir at umboða tann breiða skaran av føroyingum, ið eru sjálvstýrissinnaðir og liberalir í hugsunarhátti.
Óli Breckmann legði dent á, at so leingi vit eru í felagsskapi við Danmark er tað umráðandi, at grannarnir fáa eina borgarliga stjørn.
Løgmaður stillar upp
Anfinn Kallsberg, ið hevur verið løgmaður síðan 1998, hevur valt at stilla upp til Fólkatingið, hóast hann ikki hevur ætlanir um at taka hetta sætið, meðan hann er løgmaður.
Hann segði, at hetta valið hevur alstóran týdning fyri støðu Føroya, nú ætlanir eru um at gera Føroyar meira sjálvbjargnar búskaparliga og politiskt. Umboðið skal kunna gera seg galdandi í donskum politikki og soleiðis vinna føroyingum nøkur rættindi á sjálvstýrisleið. Hetta skal ikki gerast við hørðum útmeldingum.
Hann heldur, at tað umráðandi, at Fólkaflokkurin fær ein høvuðsleiklut og sleppur at standa á odda í føroysku umboðanini á Fólkatingi.
Fólkaflokkurin hevur gravað fyrrverandi løgmann Jógvan Sundstein framaftur úr gloymskuni, og hann skal vinna flokkinum nakrar atkvøður, ið skulu tryggja flokkinum sæti á Fólkatingi, har flokkurin hevur havt umboð í fleiri valskeið.
Valevni hjá Fólkaflokkinum:
Óli Breckmann, Tórshavn
Bergur Bærentsen, Tvøroyri
Bjarni Djurholm, Tórshavn
Deirdre Hansen, Glyvrar
Jákup Suni Joensen, Signabøur
Kjartan I. Joensen, Leirvík
Anfinn Kallsberg, Viðareiði
Jógvan við Keldu, Klaksvík
Jógvan á Lakjuni, Fuglafjørður
Leila á Lofti, Argir
Jørgen Niclasen, Sørvágur
Jóanis Nielsen, Sandavágur
Ingi Olsen, Vestmanna
Jákup Olsen, Vágur
Rúna Sivertsen, Klaksvík
Jógvan Sundstein, Tórshavn
Ingimar Tór Thomsen, Skopun
Eyðun Viderø, Sandur
