Borgarstjórin í Moskva, Yuri Luzhkov, sigur, at tað vóru tvær sjálvmorðsbumbukvinnur, sum sprongdu tær báðar bumburnar í undirgrundarbreytini í Moskva í morgun. Tann fyrra bumban brast á Lubyanka-støðini í miðbýnum í Moskva, og har doyðu minst 25 fólk. Løtu seinni brast tann seinna bumban á Park Kultury-støðini, og har doyðu minst níggju fólk.
Ein talsmaður fyri innanríkisráðið hevur váttað, at myndugleikarnir meta tilburðin sum yvirgang.
Tíðindastovurnar skriva, at fleiri milliónir fólk ferðast um tær báðar undirgrundarstøðirnar hvønn dag, og at bumburnar brustu, júst sum fólk vóru á veg til arbeiðis.
