Javnaðarflokkurin tekur ikki undir við, at túratalið hjá Smyrli verður skorið.
Tað sigur Aksel V. Johannesen, formaður í Javnaðarflokkinum, sum hevur sent út eina fráboðan.
– Suðuroyggin er tann oyggin, ið liggur longst frá meginøkinum. Túrarnir hjá Smyrli eru fáir, sum er. Tað er ikki so langt síðani, at suðuroyingar mistu ein mikudagstúr.
– Smyril er sjálv lívsæðrin hjá vinnulívinum og borgarunum í Suðuroy. Vit eiga at stremba eftir, at tey, ið búgva og virka í útjaðaranum, hava javnbjóðis møguleikar í gerandisdegnum sum restin av landinum. At lækka túratalið hjá Smyrli er at fara øvuta vegin, sigur hann í fráboðanini.
Sambært Javnaðarflokkinum, so er í krónum ikki talan um nakra stóra sparing hjá landskassanum, meðan sparingin lækkar munandi um tænastustøðið til vinnulívið og borgaran í Suðuroynni.
– Javnaðarflokkurin heitir tí á samgonguna at umhugsa hesa sparing enn einaferð, sigur Aksel V. Johannesen í áheitanini.
