Snorri Brend
Orsøkin til hetta var, at tann stoypti parturin av brimgarðinum var brotnaður og koppaður inn í sjálva innsiglingina.
Hetta førdi við sær, at tað slepst best inn í bátahylin á flóð, meðan bátar, ið eru ókunnugir við umstøðurnar í bátahylinum í Kvívík, áttu at verið meiri ansnir.
– Vit valdu tá at gera vart við hetta. Vit hugsaðu tá mest um bátar, sum vóru á veg til bátastevnuna í Vestmanna, so teir ikki komu inn higar uttan at vita av nøkrum, sigur Dánjal Petur Müller, borgarstjóri.
Síðani hevur verið arbeitt við at kanna, hvussu ein kann koma hesum trupulleikanum til lívs. Hetta er ikki bara sum at siga tað, tí tann stóri garðurin vigar rættiliga nógv – helst upp í móti 30 tonsum.
Sum skilst er ætlanin at gera ein part av uppruddingini í ár, í summar helst. Men talan er um eitt stórt og tungt arbeiði, sum má gerast við skipi og froskmanni.
– Vit arbeiða við ymiskum loysnum, sigur hann.
