Ein 65 ára gamal maður fór um 14.15 tíðina mikudagin av Nólsoy. Hann setti kós móti Havnini. Upplýst verður av politistøðini í Havn, at fólk stóðu í Nólsoy og eygleiddu hann, til hann var komin út á hálvan fjørðin.
Veðrið var eitt sindur illfýsið, men sagt verður, at maðurin var ikki ókendur á sjónum.
Tá maðurin mikukvøldið framvegis ikki var komin fram, varð leitingararbeiði sett í verk. Skip og bátar á sjónum og tyrlan leitaðu eftir Hellu, sum er ein frambygdur glastrevjabátur. Hella er reyð og hevur gult stýrhús.
Brimil og Triton hava í nátt og fyrrapartin leitað á Nólsoyarfirði, eystanfyri Nólsoynna og Sandoynna. Skip og bátar vóru eisini við í leitingini fyrrapartin hósdagin.
Tvær tyrlur hjá Atlantsflog hava eisini verið og leitað. Onnur hevur leitað í økinum eystanfyri Streymoynna, framvið fjøruni, í Heystfirði, runt Hestoynna og Koltur. Hin tyrlan hevur leitað í Nólsoyarfirði og Tangafirði.
Umframt hetta hevur tyrlan hjá donsku sjóverjuni leitað framvið norðara parti av Sandoynni og í Skopunarfirði.
Umleið klokkan 11 fyrrapartin í gjár skuldi Golfstream flogfarið hjá donsku marinuni kanna eitt vítt havøki eystanfyri og vestanfyri Føroyar.
Fyrrapartin í gjár vóru onkrir lutir funnir og latnir politinum til eyðmerkingar, men tá blaðið fór til prentingar, var framvegis hvørki maður ella bátur funnin.
