KÍ fær nú sín triðja norðmann í hópin. Umframt Simen Sandmæl og Torbjørn Grytten, so kemur nú eisini landsmaður teirra, Magnus Stramnestrø, í hópin. Tað skrivar KÍ á heimasíðu sínari.
Magnus Stramnestrø er ein 27 ára gamal miðvallari, og í KÍ-hópinum skal hann avloysa japanska Takuya Matsunaga, ið hevur valt at royna aðrar leiðir.
Nýggi KÍ-leikarin hevur royndir úr norska stórfelagnum, Rosenborg, og hann hevur eisini spælt við eitt nú Sogndal, Kristianssund og seinast Ranheim IL í norsku Eliteserien.
- Eg eri sera spentur upp á nýggju uppgávuna og ikki minst at gerast partur av felagnum, KÍ. Eg gleði meg at møta spælarum, leiðarum – ja, allari KÍ-familjuni. KÍ er ein nýggjur og øðrvísi kapittul á míni fótbóltsleið, sigur Magnus Stramnestrø við KÍ-heimasíðuna.
KÍ spælir sunnudagin á heimavølli ímóti AB. Dysturin byrjar kl.15.30.
