Sumbingar vístu sunnudagin, at hóast teir hava minsta fólkagrundarlagið av liðunum í 1. deild og eru »underdogs« í so at siga hvørjum dysti, so eru teir ikki við í bestu deildini bert til stuttleikar.
Sumba vann 3-2 á TB og er framvegis tað ovasta av teimum trimum suðuroyarliðunum í 1. deild. Sumbingar liggja í løtuni á fimta plássi við seks stigum fyri fýra dystir ? ein úrtøka uppá 50 prosent, og tað er meir enn tey flestu høvdu roknað við, áðrenn kappingin byrjaði.
Tað er ikki kortini fremmant hjá sumbingum at vinna á TB á heimavølli. Í steypakappingini noyddust tvørámenn eisini at lúta á Krossinum, ta ferðina 4-3.
Páll Magnar Kjærbæk var burturstaddur sunnudagin, og í hansara stað kom Georg Kjærbo inn á liðið. Annars vóru tað teir somu, sum byrjaðu inni og taptu 6-2 móti B36 í Gundadali næstseinasta vikuskifti.
Eisini TB noyddist at broyta sína uppstilling. Alexander Radosavljevic fekk reytt móti KÍ og var leikbannaður sunnudagin. Óli Johannesen varð settur fram í álopið saman við venjaranum Zoran Pavlovic, og uppafturrisni Tórður Holm kom inn á vanliga plássið hjá Óla millum verjuna og miðjuna.
Dysturin fekk kortini ein keðiligan enda fyri Tórð Holm. Tveir minuttir fyri leiklok varð hann vístur av vøllinum, og sostatt endaði TB fyri aðru ferð á rað ein landskappingardyst við tíggju monnum.
Heimaliðið kom á odda, tá 13 minuttir vóru spældir. Hornaspark varð sent innfyri, og Eirikur Joensen, sum annars ikki var heilt skaðafríur undan dystinum, stóð við nærmastu stong og setti pannuna á.
TB fekk nú eina lítla yvirvág, og eitt korter seinni høvdu teir vent 0-1 til 2-1. Tað vóru bert fýra minuttir ímillum málini hjá TB. Fyrst bleiv Óli Johannesen ? fer ikki við landsliðnum til Estlands, tí hann hevur próvtøkur á læraraskúlanum júst um tað mundið ? leysur nakað inni á hálvuni hjá sumbingum. Hann rak heilt fram til Sumba-málið, rundaði málverjan og legði bóltin í málið til 1-1. Tað var í 23. minutti, og í 27. minutti gjørdi Eyðun Gullok Svalbard sítt fjórða mál í fýra landskappingardystum, eftir at Dan Djurhuus og Tórður Holm í góðum samstarvi vóru slopnir ígjøgnum úti í høgra horni av vøllinum. Toppskjúttin hjá TB rakti bóltin, sum stiklaði niður í vøllin aftur og síðani á stongina og í málið.
Nú var TB knappliga frammanfyri, men leiðslan helt sær ikki hálvleikin út. Stutt áðrenn Lassin Isaksen bríkslaði fyri steðgi, fekk Sumba tað, sum TB-ararnir av røttum kundu kalla eitt kloddamál, ikki minst frá teirra egnu síðu. Bólturin bleiv sendur høgt og langt fram í TB-brotsteigin, og inni í sjálvum 5-metrinum fekk Dánjal Johan Joensen bæði stundir og pláss til at temja hann og skjóta hann í málið. Passivt verjuspæl av TB, sum annars hevði havt yvirvágina teir fyrstu 45 minuttirnar.
Sumba dróg
longra stráið
Í seinna hálvleiki komu sumbingar meiri við, og bæði liðini stríddust fyri at fáa málið, sum kundi avgera dystin til egnan fyrimun.
Og tá avtornaði, var tað heimaliðið, sum dróg longra stráið og vann. Avgerandi málið kom, tá fimm minuttir vóru eftir, og var tað Jan Poulsen, ið stóð fyri tí.
Sumba fór í mótálop, og Jan Poulsen hevði seinasta fótin á. Tá dysturin stutt seinni var lokin, fegnaðust sumbingar, meðan tvørámenn máttu ásanna, at eisini hesaferð fóru teir av Krossinum við ongum. Sumba hevur longu nú fingið fleiri stig, enn teir fingu alt árið í 1991, tá teir vóru í 1. deild seinast, og liggur á fimta plássi í landskappingini. TB verður standandi á einum stigi og hevur nú tapt tríggjar ferðir á rað. Men tað merkir ikki, at tvørámenn hava spælt illa. Marginalarnir hava bert ikki verið á teirra síðu, men fyrr ella seinni fara stigini uttan iva at koma.
