Stutt fyri midnátt í gjárkvøldið hendi eitt rættiliga ógvusligt ferðsluóhapp á Kaldbaksvegnum, stutt frá tunnilismunnanum.
Ein bilførari misti brádliga tamarhaldið á bilinum og tað andaði við, at bilurin bóltari runt á vegnum, men endaði aftur á hjólunum.
Trý fólk vóru í bilinum og umframt at senda boð eftir sjúkrabilum, mátti sløkkilið eisini á staðið at klippa bilin upp, fyri at fáa fólkini úr bilinum, so trygt, sum tilbar.
Tey vórðu flutt á Landssjúkrahúsið til kanningar, men tó at onkur teirra vóru rættiliga skelkað, og máttu fáa sálarliga kreppuhjálp, høvdu tey ikki fingið mein av óhappinum, sigur løgreglan.
Fólkini vórðu tó innløgd á Landssjúkrahúsið í nátt til eygleiðingar, men løgreglan heldur, at tá ið hugsað verður um, hvussu ógvusligt óhappið var, vóru tey ómetaliga heppin, at tey sluppu so væl, sum tey gjørdu.
