Franski William Gallas er eftir langan skaðasteðg við aftur í franska landsliðshópinum, sum skal leika á Tórsvølli í morgin. Nógv bendir á, at hann fer at manna miðverjuna saman við Lilian Thuram úr FC Barcelona.
Í øllum førum sigur hann seg vera til reiðar til uppgávuna, um venjarin vil hava hann at byrja inni.
- Vindur, regn og lítil leikvøllur við nógvum trýsti. Tað verður avgjørt ein trupul dystur í Føroyum, sigur 30 ára gamli Arsenal-verjuleikarin við heimasíðuna hjá Uefa, og leggur afturat, at skora teir ikki innan teir fyrstu tíggju minuttirnir, verður dysturin heilt øðrvísi.
William Gallas hevur við sínum drúgvu royndum skilt, hvussu hann skal orða seg, tá ið ein pinkulingatjóð bíðar landsliði hansara.
- Teir fara at hava tíggju mans aftanfyri bóltin, og vit verða noyddir at finna pláss at spæla á. Tað gera vit tó, sigur hann avgjørdur.
Við William Gallas í byrjunaruppstillingi hevur franska landsliðið ikki tapt ein dyst síðan 2004, tá ið teir vórðu útslignir av Grikkalandi í EM-kvartfinaluni.
