Fyrrverandi forsetin í USA, Donald Trump, hevur í dag biðið ein samveldisdómstól um fyribils at forða fyri, at FBI kann gjøgnumganga tey skjøl, sum samveldisløgreglan hevur lagt hald á í heimi hansara í Florida í síðstu viku.
FBI skal fyrst hava loyvi til at ganga ígjøgnum skjølini, tá ein serligur embætismaður er útnevndur til at hava eftirlit við gjøgnumgongdini, stendur í áheitanini.
Í kravinum, sum er latið einum dómstóli í West Palm Beach í statinum Florida, verður eisini kravt, at amerikanska løgmálaráðið gevur honum eina meira útgreinaðan lista yvir, hvat hald er lagt á í heimi hansara í Mar-a-Lago 8. august.
Hann biður eisini um, at ognir, sum ikki eru umfataðar av rannsóknarloyvinum, verða latin aftur.
– Politikkur má ikki ávirka umsitingina av rættvísi, verður sagt í kravinum.
– Rættartrygd er eitt skjøldur, ið verjir amerikanarar. Tað má ikki brúkast sum vápn av politiskum orsøkum.
/ritzau/Reuters
