Síðani tosið um veðurlagsbroytingarnar tók seg upp, hevur fyri tað mesta verið tosað og skrivað um, hvussu ísurin í póløkjunum og fjøllunum bráðnar, og hvussu heimshøvini fara at fløða. Nú vísa kanningar, at veðurlagsbroytingarnar hava eisini gjørt tað tropiska beltið á Jørðini breiðari. Amerikanskir vísindamenn siga, at tey seinastu 25 árini hevur tað tropiska beltið breitt seg skjótari, enn vísindin hevði roknað við. Sambært kanningunum er tað tropiska beltið breiðkað millum 2,0 og 4,8 breiddarstig, sum svarar til ávikavist 225 og 530 kilometrar norðureftir og suðureftir.
