Tað eru 19 spælarar í føroyska leikarahópinum. Tá ið tað eru í mesta lagi 16 spælarar á dómaraseðlinum, so hevur tað alla tíðina verið greitt, at tríggir spælarar verða millum áskoðararnar.
Nú er tað greitt, hvørjir teir tríggir eru, sum venjararnir hava gjørt av, í dag skulu sita millum áskoðararnar.
Teir tríggir eru Allan Norðberg, Rói á Skipagøtu Ellefsen og Óli Mittún.
At tað eru hesir tríggir, sum eru settir millum áskoðararnar, ber við sær, at tað eru fýra strikuspælarar í 16 manna hópinum. Teir eru Teis Horn Rasmussen, Ísak Vedelsbøl, Pætur Mikkjalsson og Helgi Hildarson Hoydal, sum varð innkallaður eftir, at hópurin hevði verið saman fyrstu ferð. Hann var ikki við í fyrstu atløgu, tí hann var skaddur. Strikuspælararnir eru eisini góðir verjuspælarar.
Føroysku áskoðararnir eru við at fjølgast í høllini. Teir eru litaðir í føroysku litunum, og teir eru rættiliga mælskir.
Føroysku spælararnir hava verið á vøllinum í stóru høllini í góða løtu og hita upp.
##med2##
