Talv
Ungi havnarmaðurin hevði vinnandi støðu í seinasta talvinum, men lat tíverri íslendingin sleppa við skrekkinum. Skjótt kann tað venda í talvi. Tapið viðførdi eitt kortini flott triðja pláss.
Olaf Berg fekk eins nógv stig sum nr. 2, men hevði verri mótstøðustig. Vinnari í elsta bólkinum varð danin Kristian K. Petersen við 4,5 stigum av 6 møguligum. Olaf fekk 4 stig meðan Martin Poulsen fekk 2,5 stig, sum gav honum 9. pláss.
Olaf og Martin, sum umboðaðu Føroyar í elsta bólkinum, fingu báðir eina góða byrjan við 1,5 stigum eftir fyrstu tvey umførini. Síðani steðgaði Martin upp, meðan Olaf streyk víðari móti toppinum.
Olaf telvaði væl. Tað sæst týðiliga í talvum hansara, at sjálvsálitið er í topp. Olaf var styrkismettur sum nummar átta av tólv, og triðja plássið prógvar øgiligu framgongdina hann hevur havt í seinastuni.
Ongantíð fyrr hava føroyingar vunnu heiðursmerki í elsta bólkinum, og Olaf hevur enntá tvey ár eftir í elsta bólkinum. Hinvegin varð hetta seinastu ferð Martin hevði aldur at luttaka í NM fyri unglingar. Martin hevur, eins og Olaf, umboðað Føroyar í NM síðani 1997, og sum oftast við frálíkum úrslitum.
Sum heild góð úrslit
Føroyar høvdu á fyrsta sinni tveir luttakarar í øllum fimm bólkunum, eins og hini norðurlondini. Í B-bólkinum (føddir 1987-88) fekk Rógvi Mortensen hálvtannað stig, meðan Jón Gregersen fekk hálvt stig. Føroyingarnir tóku javnt í seinasta umfarinum. Eitt hampiligt úrslit hjá Rógva, sum gevur honum nøkur ratingstig. Tað er altíð torført at debutera í slíkari sterkari kapping, og tað má Jón ásanna.
Helgi Ziska og Rógvi Dragaberg fingu báðir 3 stig í bólki C (føddir 1989-1990). Tvey góð úrslit sum góvu teimum eitt deilt fimta pláss. Teir vóru tætt við topp trý, men báðir taptu tíverri í sætta og seinasta umfari.
Rógvi E. Nielsen úr Sandavági hevði eina góða kapping í bólki D (føddir 1991-92). 3,5 stig bleiv úrtøka hansara og rakk tað til eitt deilt triðja pláss. Men verri mótstøðustig viðførdi, at hann offisielt bleiv nr. 5. Hjalti T. Jógvansson fekk í seinasta umfari bjargað sær ein javnleik. Hjalti hevði undan umfarinum einki stig, men fall kortini ikki í fátt!
Í yngsta bólkinum (føddir 1993 og seinni) stríddust Rúni Vørmadal og Olaf R. Samuelsen manniliga. Teir høvdu lægstu ratingtølini, og fingu báðir eitt stig. Teir fara helst at verða drúgvir í NM-høpi.
Samanumtikið gekk tað væl hjá føroyingum. Eitt stórð herðaklapp til Talvsambandið, fyrireikarnir, venjararnir, foreldur og hjálparfólk. NM 2005 verður í Norra.
Javnt í Linares
Sterkasta kapping í ár verður í hesum døgum leikt í spanska býnum Linares. Sjey telvarar taka lut, og telvað verður dupultumfar, tvs. 12 umfør. Hesir eru: Kasparov (2831), Kramnik (2777), Shirov (2736), Topalov (2735), Leko (2722), Vallejo (2663) og 16 ára gamli Radjabov (2656).
Fýra umfør eru leikt, og einasti telvari við meir enn 50% skoru er Leko, meðan einasti telvari undir 50% skoru er evnaríki Radjabov. Kappingin er ung enn, og nógv henda. Kasparov hevði eftir evstamark mánadagin hvíta fólkið móti Kramnik.
