- Vit hava fingið staðfest, at tað ber væl til at ala tosk í kørum á landi, fiskurin veksur væl, eins og keyparar eru sera fegnir um fiskin, sigur Richard Rognsøy, stjóri. Tað var stórur spenningur millum fólk, tá farið varð undir royndirnar at ala tosk í Føroyum. Serliga var tað toskurin av Føroyabanka, sum hevði áhuga. Hetta er ein serstakur stovnur og ein serstakur fiskur, sum veksur skjótari enn annar toskur, vit kenna.
Seinastu tvey til trý árini hevur toskur verið aldur í kørum í Hvalba og í aliringum á Árnafirði, men í løtuni er ikki greitt, hvørja lagnu toskaalingin í Hvalba fer at fáa.
Seinastu fiskarnir í Hvalba eru nú tiknir og tey bæði kørini, har toskurin hevur verið aldur, standa tóm.
Richard Rognsøy, stjóri í Faroe Cod Farm, sigur, at teir nú fara at gera status yvir, hvussu henda tíðin hevur vignast.
Hann vísir á, at nú fiskurin seinastu vikurnar hevur verið tikin, hava prísirnir á toski ikki verið nakað serligir, men við at tillaga tøkuna hava teir roynt at fingið sum frægast burtur úr.
Richard vísir á, at prísurin fyri alda toskin hevur ligið á umleið sama støði, sum prísurin fyri villan tosk.
- Vit hava fingið góðar afturmeldingar frá teimum, sum hava keypt fiskin, og eitt nú í Fraklandi siga tey seg ongantíð hava sæð slíkan tosk áður. Eisini aðrastaðni er afturmeldingarnar góðar, og prísútlitini frameftir við framhaldandi aling í Hvalba eru góð.
Stjórin sigur, at henda tíðin hevur givið teimum nakrar avgerandi staðfestingar, sum arbeiðast kann víðari við.
- Vit hava fingið staðfest, at tað ber væl til at ala tosk í kørum, fiskurin veksur væl, eins og keyparar eru sera fegnir um fiskin, sigur Richard Rognsøy.
