Føroyski súkklarin, Torkil Veyhe, er væl við í stóru donsku súkklukappingini, PostNord Danmark Rundt, sum verður súkklað á donsku landavegunum í hesum døgum.
Torkil Veyhe, sum súkklar við ColoQuick-CULT, er vorðin kapteinur – tann, ið súkklað verður fyri – og eftir eitt gott úrslit á kongateininum í Vejle í gjár lá hann nummar 18 í samlaðu kappingini.
Í dag varð einkultstartur súkklaður. Torkil prógvaði, at hetta er ein teinur, ið hann er stinnur á. Torkil bleiv nummar níggju, 1:02 aftanfyri vinnaran, eysturríkska Matthias Brändle (Trek – Segafredo).
Torkil Veyhe er nú nummar seks í samlaðu kappingini, 1:16 aftanfyri oddamannin, danska Mads Pedersen (Trek – Segafredo). Tað er einki at taka seg aftur í, at hetta er eitt rimmar úrslit, um tað heldur sær.
Fimti og seinasti teinur í kappingini verður súkklaður í morgin. Tá verða 198 kilometrar súkkaðir úr Ebeltoft til Aarhus.
