Klokkan 18.30 í kvøld bresta 1. deildarliðini hjá Skála og B68 saman. Talan er um lyklauppgerð, ið kann fara at vísa seg at hava stóran týdning fyri, hvørji liðini verða, sum fara at flyta upp í bestu deildina.
Í løtuni verður arbeitt við at leggja nýtt undirlag á vøllin á Skála. Tí verður dysturin í kvøld spældur í Leirvík.
B68 er næstfremst við 40 stigum. Um tað í kvøld eydnast toftamonnum at vinna fulla úrtøku, so flytir B68 framum HB, ið hevur 42 stig, og sum hevur verið oddalið nógvu tær seinastu vikurnar. Skála er á fjórða plássi við 35 stigum. Um tað eydnast Skála at vinna í kvøld, so lyfta skálamenn seg framum FC Suðuroy, ið er argasti kappingarneytin hjá Skála, tá ið tað ræður um uppflytingina.
Mánakvøldið hevði TB vitjan av EB/Streymi. TB vann sannførandi 6-2 sigur, sum ber við sær, at hesi bæði liðini hava sama stigatal.
Eftir 1. hálvleik var heimaliðið frammanfyri 2-1. Fyrsta korterið eftir steðgin økti TB til 4-1, og TB var frammanfyri 6-1, áðrenn EB/Streymur í næstsíðsta minutti pyntaði um.
Mánakvøldið
TB-EB/Streymur 6-2 (2-1)
1-0: Teitur Justinussen 12.
2-0: sjálvmál 42.
2-1: Árni G. Olsen 44.
3-1: Ragnar Tausen 48.
4-1: Arthur Poulsen 59.
5-1: Carl M. Bech 74.
6-1: Ragnar Tausen 78.
6-2: Rógvi Egilstoft Nielsen 89.
Í kvøld
Skála-B68: Kári J. á Høvdanum kl. 18.30 – í Leirvík
Støðan
HB 42
B68 40
FC Suðuroy 37
Skála 35
B36 33
Víkingur 33
KÍ 26
EB/Streymur 23
TB 23
B71 14
TB, B71, Skála og B68 hava spælt 21 dystir, og hini liðini hava spælt 22 dystir
