Í næst størsta býi í Ukraina, Kharkiv, hava tokbreytirnar virkað sum bumburúm, síðan Russland gjørdi innrás í Ukraina hin 24. februar.
Men, í dag vóru tokbreytirnar í býnum næstan í vanligari koyring aftur. Hetta hendir, hóast býruin javnan er fyri russiskum rakettálopum.
- Vit hava tikið upp aftur jarnbreytarkoyringina og hava latið upp aftur flestu jarnbreytarstøðir í Kharkiv.
Tað sigur borgarstjórin í býnum, Igor Terekhov. Hann leggur aftrat, at tað er tørvur á, at tokini koyra fyri at fáa ferð aftur á búskapin.
- Tað verður ókeypis at koyra í toki næstu tvær vikurnar, leggur borgarstjórin aftrat.
Tíðindastovan NTB veit at siga, at tokbreytarnetið í Kharkiv hevur 30 støðir og fleiri av hesum hava virkað sum bumburúm fyri fólk í túsundatali.
Næst størsti býur í Ukraina liggur har eysturi í landinum, nær markinum til Russlands.
Sagt verður, at tríggjar av tokbreytarstøðunum í landnyrðingspartinum av Kharkiv framvegis vera stongdar av vanda fyri bumbuálopum.
- Kharkiv hevur verið fyri russiskum álopum síðan byrjanina av innrásini. Men fyri tíð síðan tóku russiskar deildir seg aftur úr økjum kring býin, veit NTB at siga.