Terji Nielsen
Stendur tú í skúlagarðinum á Toftum og skoðar skúlan, so sær hann ikki serliga lokkandi út. Men innan fyri køldu beton múrarnar er luftin full av virkisfýsni, og tú kennir við eitt, at her hava lærarar og næmingar tað stak gott saman.
Bjóða komandi næmingum á vitjan
Ein siður, sum tey á Tofta Skúla hava, er, at tey bjóða komandi næmingum og foreldrum teirra á vitjan í skúlanum. Hetta verður gjørt, so at næmingarnir eru tryggir við karmarnar, áðrenn farið verður í skúla, og eisini so at næmingarnir kenna hvønnannan.
Fyrstu ferð tey hittast, er sjálvsagt til innskrivingina, men tá er tað ofta so mikið av rokan, at tey ikki hava stundir til at heilsast og hyggja nærri at skúlanum. Nakað eftir innskrivingina verða so allir næmingarnir, saman við foreldrunum, boðin til eitt hugnakvøld á skúlanum, har lærararnir spæla ymisk spøl við teimum, vísa teimum skúlan og annað.
Stutt fyri summarfrítíðina verða børnini boðin til ein skúladag. Hendan dagin, sum tey høvdu nú mikudagin, hava børnini góðar stundir til at ganga runt á skúlanum og hyggja seg um. Haraftrat sleppa tey at royna, hvussu ein skúladagur gongur. Saman við komandi flokslærara sínum klippa tey, spæla uttan fyri og í fimleikahøllini, umframt at tey eisini síggja komandi skúlastovu sína.
Nærumhvørvi ? ein týðandi partur av frálæruni
Tað er ikki bert inni í skúlastovunum at frálæran fer fram. Stórur dentur verður lagdur á, soleiðis at nærumhvørvið eisini verður krøkt upp í frálæruna. Eitt nú er tað vanligt, at farið verður við skúlaflokkum út á Starvatn, so at næmingarnir til dømis kunnu eygleiða fuglalívið, sum er har á staðnum.
Eisini er tað so, at nakrir næmingar fyri nøkrum árum síðani settu nøkur trø niður á einum stykku, sum kommunan eigur, og sum skúlin hevur fingið at røkja. Skipanin er soleiðis, at hvørt ár er tað sjeyndi flokkur, sum tekur sær av at røkja stykkið. Fyri hetta fær flokkurin eina lítla samsýning frá kommununi. Hetta førir sjálvsagt eisini við sær, at ungdómurin fær størri virðing fyri umhvørvinum, og tað er jú ógvuliga umráðandi fyri framtíðina, at tað komandi ættarliðið lærir hetta.
