Bogi Andreasen, formaður í byggi- og býarskipanarnevndini, sigur í tíðindaskrivi, at Mentamálaráðið hevur vent sær til kommununa við ynski um, at býráðið finnur hóskandi pláss til tjóðpallin.
– Vit tosa tí um eina býarætlan fyri hetta økið, har eisini verður hugsað um almenna ynskið um staðseting av einum tjóðpalli, og at vit samstundis realisera ynskið um at loysa allar komandi parkeringstrupulleikar við m. a. einum parkeringshúsi. Býarskipanarliga er jú talan um bæði miðbý og ein part av havnarfrontinum hjá býnum. Tí gjørdi býráðið av, at ein heildarætlan skal gerast fyri Skálatrøð og økið har á leið, sigur Bogi Andreasen.
Hann sigur, at talan er um eina stóra ætlan, sum hann ikki kann koma nærri inn á, fyrrenn málið er komið víðari. Men hann vísir tó á, at ætlanin í vikuni var fyri í byggi- og býarskiparnarnevndini, og tað tóktist at vera rættiliga breið semja um, at ætlanirnar eru realistiskar.
– Her eru avbera góðir møguleikar at kombinera nógv av tí, sum ynski eru um at seta í verk í økinum. Fleiri spennandi verkætlanir eru longu í gongd í økinum. Hetta er tí ein ótrúliga spennandi verkætlan, sum eg rokni við, at breið semja fer at verða um í býráðnum, sigur Bogi Andreasen.
