Klokkan sjey í kvøld fór løgtingið at atkvøða um heili 147 broytingaruppskot frá samgongu og andstøðu. Rás2 hevur eykatíðindasending klokkan 22. Atkvøðugreiðslan í løgtinginum fer væntandi at vara í umleið hálvan annan tíma. Atkvøtt verður um broytingaruppskotini undir einum, bæði í meirilutaálitinum hjá samgonguni og minnilutaálitunum hjá teimum trimum andstøðuflokkunum, byrjað verður við broytingum til grein-1 í fíggjarlógini, og hildið verður á grein fyri grein.
Eftir at atkvøðugreiðslan er liðug er ein onnur 2. viðgerð á skránni, 2. viðgerð av uppskoti um dupultskattaavtalu við Isle of Man, ið er eitt avgreiðslumál.
Síðani endar tingfundurin, og steðgur verður í tingarbeiðinum. Tá fer samgongan væntandi at orða eitt broytingaruppskot, har tað í samband við játtanina til Landssjúkrahúsið verður staðfest, at samgongan bindir seg til at fylgja niðurstøðuni hjá serfrøðingabólkinum, ið skal kanna viðurskiftini á Landssjúkrahúsinum. Hetta fyri at senda eitt signal um, at samgongan vil játta meira enn 344 milliónir krónur til Landssjúkrahúsið, men ikki fyrr enn serfrøðingakanningin er liðug. Landssjúkrahúsið hevur sjálvt víst á, at tey hava tørv á 374 milliónum fyri at varðveita verandi tænastustøði.
Løgtingið ætlar at víkja frá vanligu tíðarfreistunum og avgreiða allar 3. viðgerðir í kvøld, harímillum 3. viðgerð av fíggjarlógaruppskotinum fyri 2008. Tí verður tað væntandi eitt drúgt kvøld hjá tingfólki, sum møttu á tingfundi klokkan níggju í morgun.
Rás2 hevur eykatíðindasending klokkan 22.
