Guðrið Hansdóttir setti sær fyri, at til hesa útgávuna skuldi hon bara samstarva við listafólk, sum hon ikki hevði samstarvað við áður. Hetta fyri at bjóða seg sjálvari av, og fyri at fáa eitt nýtt ljóð, tí Guðrið Hansdóttir tímir ikki at gera somu plátu fleiri ferðir.
- Sum tónleikari hevur tú ofta fólk sum tú arbeiðir fast við, tí tað er gott og nemt. Tit kennast, tú veit hvat tey duga, og hvussu tey hugsa. Hesaferð vildi eg gera nakað annað.
Guðrið Hansdóttir hevur valt listafólk, sum hon heldur vera spennandi og dugnalig. Eitt nú Høgna Lisberg, sum hevur framleitt útgávuna.
- Tað tók eina løtu at finna eitt arbeiðslag, men tá vit funni stevið gekk tað gott.
Hon heldur at nýggja útgávan ber brá av at vera upptikin beinleiðis.
##med2##
- Útgávan sum kom frammanundan var nógv produsera, tá var kela fyri hvørjum smáluti. Nýggja útgávan ljóðar meira sum ein bólkur sum spælir í einum rúmi, tað nýtist ikki at vera perfekt. Um kenslan er góð, og tað svingar væl, so brúka vit tað hóast ein tóni er við síðurnar av.
Tað eru fýra ár síðani Guðrið Hansdóttir seinast gav eina heildarútgávu út. Nýggja útgávan hevur vakt áhuga bæði í Føroyum og uttanlands.
- Eg haldi, at fólk eru við uppá tað og spent. Útgávan er á føroyskum, men tað tykist ikki at vera ein trupulleiki hjá áhoyrarum uttanlanda, og tað er spennandi.
Fyri nøkrum árum síðani spældi Guðrið Hansdóttir nógv í útlandinum, seinastu árini hevur hon spælt mest í Føroyum, men áhugin uttanlanda ger, at hon er farin hugsa út um landoddarnar.
- Tú veit ongantíð, hvussu tónleikurin verður móttikin, tá tú stendur í studio kanst tú hugsa at hetta veðrur populert, men so kann tað vísa seg at vera okkurt heilt annað sum fólk taka til sín.
Tónleikarar
Guðrið Hansdóttir, sang, gittar, blokkfloytu, omnichord, klarinett
Høgni Lisberg, trummur, bass, guitar, klaver, sang, op-1, slagverk
Marianna Winther Nagata, kór
Katrina Olsen, kór
Dania O. Tausen, kór
Elinborg Pálsdóttir, kór
Jóhan Hentze, trompet og flugelhorn
Jákup Zachariassen, steel gittar
Uni Leitisstein Hansen, útvarpsrødd
Orða- og tónasmið
Guðrið Hansdóttir
Beinir Bergsson
Karl Andrias Stórá
Framleiðsla
Høgni Lisberg, lagt til rættis, framleitt, ljóðblandað, frumbandað
Guðrið Hansdóttir, lagt til rættis og framleitt
Kirstin Helgadóttir, perma og myndir
