Í næstum verður skipað fyri Thai festivali í Havn, har høvi verður at koma nærri tailendskari mentan. Til tiltakið verður tailendskur matur, tónleikur, undirhald, list, dansur og annað, ið er knýtt at Tailandi, á skránni.
Pat Areesaman er ein av fyriskiparunum, og hon vil geva føroyingum eina øðrvísi uppliving og ein smakk av Tailandi.
- Vit vilja kunna um tailendskan mentan og geva føroyska fólkinum eina hóming av, hvussu tað er í Tailandi. Hetta kann kanska enntá eggja føroyingum at fara til Tailands at ferðast, sigur Pat Areesaman, sum hevur búð í Føroyum í sjey ár.
Kunnu tosa um sína støðu í Føroyum
Thai festivalurin er fyrst og fremst eitt tiltak fyri tailendarar í Føroyum.
- Festivalurin gevur tailendarum í Føroyum møguleika at knýta bond við hvønn annan. Nógvir tailendarar duga ikki føroyskt, so her er møguleiki hjá teimum at tosa sítt móðurmál, sigur fyriskiparin.
Um mann hevur trupulleikar ella følir seg einsamallan, er tað ein upplagdur møguleiki at tosa um sína støðu í Føroyum við aðrar tailendarar til Thai festivalin.
Yvirraskandi góð undirtøka
Hetta er aðru ferð, at skipað verður fyri hesum tiltakinum. Fyrstu ferð var í 2014, men tá var tað eitt privat tiltak bert fyri tailendarar og familju teirra.
Í ár vórðu 300 billettir settar til sølu, og tað er longu útselt. Pat Areesaman merkir ein stóran og øktan áhuga fyri Tailandi í Føroyum.
- Vit væntaðu ikki, at føroyska fólkið var so áhugað í Tailandi. Billettsølan vísir í øllum førum, at áhugin er til staðar.
Ætlaninar eru, at Thai festivalurin skal vera enn størri næstu ferð. Sum nú er, verður hann bara hildin fjórða hvørt ár. Fyriskipararnir vóna at finna fleiri stuðlar til næsta Thai festival, soleiðis at enn fleiri føroyingar fáa møguleikan at uppliva tailendska mentan í Føroyum.
Thai festivalurin verður í Dansifrøði 9. september.
