Bjartskygni í føroyska samfelagsbúskapinum er væl betri nú, enn tað var fyri hálvum ári síðan. Samlaða treystitalið er farið úr 19 upp í 32 eftir hálvum ári. Hetta er hægsta treystitalið síðan 2014, tá ið tað var 37, skrivaði Hagstova Føroya í seinastu viku, tá ið teir kunngjørdu úrslitini frá nýggjastu konjunkturkanningini, sum varð gjørd í januar í ár.
– Í tilfeingis- og ídnaðarvinnunum, sum serliga virka á útflutningssíðuni í føroyska búskapinum, er stórt bjartskygni í løtuni. Har síggja tey ein rættiliga stóran vøkstur í bíleggingunum, og vørugoymslurnar minka. Tilfeingis- og ídnaðarvinnurnar vænta munandi vøkstur í framleiðsluni komandi árið, skrivar Vinnuhúsið.
Jaligar metingar
Tey vísa á, at í tænastuvinnunum hevur vøksturin í umsetninginum verið stórur hetta seinasta árið, og her vænta tey, at vøksturin í umsetninginum fer at halda fram í ár. Tey vænta tó ikki, at arbeiðstørvurin í tænastuvinnunum fer at verða enn størri í ár.
– Jaligu metingarnar í tilfeingis- og ídnaðarvinnunum, umframt tænastuvinnum, er fremsta orsøkin til at samlaða treystitalið fer so nógv upp í nýggjastu konjunkturkanningini frá januar í ár. Handilsvinnan er somuleiðis bjartskygd, men hon hevur avbjóðingar. Stórur vøkstur hevur verið í søluni í hetta seinasta árið, men handilsvinnurnar vænta ikki eins stóran vøkstur í ár. Hetta kemst helst av stóru avbjóðingini, sum partar av handilsvinnuni hava við at útvega arbeiðsmegi, skrivar Vinnuhúsið.
##med2##
Vísitalið í byggivinnan fellur
Støðan í byggivinnuni er ein onnur.
– Í byggivinnuni vænta tey, at tørvurin á arbeiðsmegi fer at minka komandi árið, tí fellur vísitalið í byggivinnuni úr 13 niður á -1, frá juni 2019 til januar í ár. Hetta skal tó neyvan fatast sum, at byggivinnan væntar, at virksemið fer at minka stórvegis í nærmastu framtíð. Hetta skal heldur tulkast í ljósinum av gongdini seinastu árini, støðuni í løtuni og útlitunum fyri, at fleiri størri byggiverkætlanir eru um at verða lidnar, skrivar Vinnuhúsið.
Teir vísa á, at tað hevur verið stórt trýst á byggivinnuni seinastu árini, og tørvurin á arbeiðsmegi er metstórur í løtuni, men fleiri størri byggiverkætlanir fara at verða lidnar um somu tíð í hesum árinum. Tí væntar byggivinnan helst, at tørvurin á arbeiðsmegi verður nakað minni, hóast tað framvegis fer at verða stórt virksemi í byggivinnuni, tí ordrabøkurnar eru framvegis stórar.
Á toppinum
Vísitalið hjá føroysku brúkarunum fellur úr 19 niður á 5, frá juni í fjør til januar í ár.
– At vísitalið hjá føroysku brúkarunum fer so langt niður, kemur neyvan óvart á nakran. Flestu brúkarar og borgarar annars gera sær sínar metingar og niðurstøður um búskaparligu gongdini umvegis tíðindaflutningin í fjølmiðlunum, og seinastu mánaðirnar hava búskaparligu tíðindini fyri stóran part snúð seg um metlága arbeiðsloysið, og at føroyski búskapurin er á toppinum í einum hákonjunkturi. Tá ið vit eru á toppinum, er bert ein vegur, og tað er niðureftir. Búskaparligu metingarnar hjá brúkarunum kunnu tí neyvan vera stórt øðrvísi, skrivar Vinnuhúsið á heimasíðuni.
