Hesa vikuna fylgir Sosialurin stórhendingini, sum Mentanarhúsið í Fuglafirði er karmur um um vikuskiftið. Fyrsti alheims (globali) festivalurin fer av bakkastokki í 40 londum samstundis og Føroyar eru partur av hendingini, ið er vælgerðartiltak til frama fyri AIDS rakt børn. Fríggjakvøld er kvøld teirra yngru, meðan leygarkvøldið er ætlað teim tilkomnu og eru bólkarnir, sum spæla til cafe og dans eisini skipaðir eftir hesum.
Vit hyggja nærri eftir bólkunum og hava spurt teir um manning og hví teir stuðla tiltakinum One World Beat. Tíverri eydnaðist ikki at fáa orð á allar bólkarnar innan evstamark, men vit tekna tó eina nokkso fullfíggjaða mynd av teimum, ið fara á pall leygarkvøldið.
Twilight
Bólkurin er millum royndastu bólkar í landinum og er vælumtóktur til dansitiltøk og veitslur. Bólkurin hevur eisini sermerkt seg á tann hátt, at tað hevur eydnast at halda saman í mong ár og eisini at fáa til vega góða útgerð og ein so frálíkan buss, har rúm er fyri bæði útgerð og góðum ferðamøguleikum. Og hetta er ofta komið væl við hjá bólkinum, sum eittnú hevur verið á tónleikaferð í Íslandi meira enn einaferð.
Í Twilight leika Kartni Fornagerð, bass, Robert Magnussen, guitar og sang, Einar leikar trummur og Hans Andreas Højgaard keyboard og umframt eru eisini aðrir tónleikarar við bólkinum, sum ofta letur bæði tónleik og útgerð til størri tiltøk.
Tey av Kamarinum
Hesin bólkurin er óivað elsti virkni bólkurin í landinum. Komandi ár hevur bólkurin spælt í 50 ár og er hetta so at siga uttan slit.
- - Vit leika á okkara 50 ?instjúginda ári, í hvussu er eg og Eyðbjørn, sigur Nicolina Jacobsen um tónleikasøguna hjá systkjunum báðum.
Bólkurin hevur givið nakar útgávur út og telsit miilum undangongufólkini, sum vóru við frá byrjan innan útgávuvirksemi í Føroyum.
Í dag er manningin hendan: Nicolina, sang, Eyðbjørn, ljómborð, Jóan Petur Andreasen, ljómborð og Árni Andreasen, guitar og hevur henda manning spælt nú í nøkur ár.
Martin Joensen
Hann kenna vit frá øllum teim frálíku sangunum, sum í dag mangir eru fólkaogn. Fleiri útgávur hevur hann á baki, bæði solo og saman við øðrum. Martin leikar sjálvur guitar og syngur og afturat sær hevur hann góða manning. Eyðun Hansen á guitar, Pauli Magnussen, bass og Jónleif Jensen, trummur.
Tilfarið er alt eftir Martin, men fleiri nýggjar útsetingar eru og so er eisini ymiskt, sum hann hevur givið út saman við øðrum, t.d. Vestmonnum, og ymiskt eftir Martin, sum onnur hava spælt og sungið inn, so lagt er upp til eina hugnaløtu við nýggjum og góðum gomlum, sum mong helst kunnu njóta og kanska eisini syngja við.
Ronnie Poulsen
Hann gjørdist kendur, tá hann tók lut í singer/songwriter kappingini á Hafnia. Hann spælir, saman við Sveini, sjálvandi eisini sítt tilfar, sum er í hesum stílinum og er hetta so sera hóskandi til júst eitt kvøld, ið er skipað sum cafe, har dansurin seinni tekur yvir.
Fluffy Toys
Tað hevur ikki eydnast at fáa orð á menninar í Fluffy, men teir borga fyri góðum og vælspældum tónleiki frá 60?unum og fram í 90?ini. Teir fimm eru væl samanspældir og fara at taka um endan á stuðulsdansinum leygarkvøldið ? Einar, Dagfinn, Bjarni og Kenneth eru nakrir av sera vælspælandi og vælumtókta bólkinum Fluffy Toys.
Ronnie og Sámal
Teir eru kendir hvør í sínum lag og síðstu mongu árini eisini sum duo. Teir eru í fólkatónleiknum fyri tað mesta og fólk flest kenna seg aftur í tónleiknum, sum dugnaligu tónleikararnir og undirhaldararnir borga fyri. Ronnie Nielsen og Sámal Ravnsfjall hava mangan Kolbein Simonsen afturat sær á bassi og ger tað ikki støðuna verri, heldur tvørtur ímóti.
Afeginn
Hetta er sera vælleikandi danskur bólkur, sum eisini tekur lut í One World Beat og teir hava lagt seg eftir folk-rock tónleikinum, so teir hóska eisini væl í heildina.
Tey tilkomnu
Allir tónleikararnir, ið tað eydnaðist at koma í samband við innan evstamark, siga seg fegnast um tiltakið.
- Tað er gott, at slíkt verður gjørt, tað kundi gott verið oftari, at slík hjálpartiltøk vóru, sigur Nicolina Jacobsen.
- So avgjørt eitt gott tiltak og spennandi er, at tað er globalt. Vit eri við gleði við til at stuðla, sigur Martin Joensen.
Og Kaj Johannsen frá FUT, sum samskipar tiltakið, hevur eisini borið fram, at vælvildin er sera stór í samband við fyrireikingarnar.
Lagt er upptil eitt gott og hugnaligt leygarkvøld fyri tilkomna lurtaran í Mentanarhúsinum í Fuglafirði og so kann ein enntá stuðla góðum endamáli, bert við at hugna sær og njóta góðan tónleik.
FAKTA
One World Beat er alheimsfestivalur, har øll arbeiðsorka er sjálvboðin og peningurin fer í ár til børn, ið hava Aids/HIV. Felagsskapurin Keep a Child Alive arbeiðir fyri hesum og fær peningin.
Føroyar eru partur av alheimsfestivalinum, sum fer av bakkastokki í 40 londum samstundis. Í Føroyum er Mentanarhúsið í Fuglafirði karmur um tiltakið 19. og 20. mars.
FUT er høvuðsfyrireikari. Til ber eisini at stuðla við at fara inn á heimasíðurnar hjá omanfyri nevndu felagsskapum.
Í Føroyum fara dugnaligir á pall í Fuglafirði um vikuskiftið; fríggjakvøldið er fyri yngraættarliðið og leygarkvøldið meira fyri tey tilkomnu, har hugnin er í hásæti við tónleikacafé og góðum dansi.
Keep A Child Alive
Keep A Child Alive hevur til endamáls at útvega lívsneyðugan heilivág til tær 3,2 milliónirnar børn, ið liva við HIV/eyðkvæmi (AIDS) í triðja heiminum. Hvønn minutt doyr eitt barn, tí at tað ikki hevur atgongd til lívsleingjandi antiretrovirala (ARV) viðgerð, og Keep A Child Alive hjálpir við at útvega antiretroviralan heilivág til tey børn, ið liva við HIV/eyðkvæmi (AIDS). www.keepachildalive.org
One World Beat
One World Beat er eitt non-profit-tiltak við høvuðssæti í Sveits. Endamálið er at savna samfelagsáhugaðar tónleikarar og vælgerð til frama fyri sosiala broyting; Tónleikur ið ger Mun!
One World Beat er eitt samtak av sjálvbodnum, og festivalurin loyvir tónleikarum og sjálvbodnum framat einum palli at bera sín boðskap fram, meðan teir styrkja tilvitanina hjá øllum Heiminum. Á hendan hátt útvegar festivalurin alneyðugan pening til at stuðla neyðstøddum. One World Beat samstarvar á hvørjum ári í felag við nógvar vælgerðarstovnar um hetta málið. www.oneworldbeat.org
