Hóast formaðurin í Tjóðveldi, Høgni Hoydal, á flokstingi Tjóðveldis um vikuskifti greitt fríggjaði til Javnaðarflokkin og segði, at verandi andstøðuflokkar vóru eitt gott boð upp á eina samgongu eftir komandi løgtingsval, vil formaðurin í Javnaðarflokkinum, Aksel V. Johannesen, ikki geva nøkur lyfti enn. Tað var greiði boðskapurin í tíðindunum hjá Kringvarpi Føroya á miðdegi í dag.
Les eisini Hetta verður ein lagnustund fyri Føroyar
Í samrøðu við Kringvarp Føroya gjørdi Aksel V. Johannesen tað greitt, at Javnaðarflokkurin ikki vil lata dyrnar aftur fyri Sambandsflokkinum undan valinum. Hann vísti millum annað á, at eftir eitt val snýr tað seg um, at kunna telja til 17 og fáa meiriluta, soleiðis at flokkurin kann føra sum mest av sínum egna politikki.
- Vit hava sagt fleiri ferðir longu, og siga tað enn, at Javnaðarflokkurin fer ikki í samgongu við Fólkaflokkin, men vit halda dyrnum opnum fyri øllum hinum flokkunum, segði Aksel V. Johannesen.
Hetta hóvar nokk Tjóðveldinum illa, sum á flokstingi um vikuskifti avgjørdi, at spurningurin um loysing enn einaferð skuldi vera høvuðsmálið í valstríði floksins.
Les eisini Loysing skal vera eitt høvuðsmál í valstríðnum
- Sum støðan er nú, snýr tað seg fyrst og fremst um at tryggja haldføri í føroyska búskapinum og gera korini hjá vanliga føroyinginum betri. Eftir valið vilja vit føra javnaðarpolitikk, og eg haldi, vit kunnu skipa samgongu bæði við andstøðuflokkunum og við Sambandflokkinum, segði Aksel V. Johannesen millum annað.
Aksel V. Johannesen gjørdi tað púra greitt, at hann vil ikki skipa nakað slag av blokkpolitikki undan komandi løgtingsvalinum. Væntandi læra vit enn meiri um, hvørjar Føroyar Javnaðarflokkurin ynskir sær og hvørjum teir kundu hugsa sær at skapa tær saman við, á landsfundi Javnaðarfloksins, sum verður um vikuskiftið.
