Uppskotið um at lækka inntøkumarkið fyri lestrarstuðul verður nú tikið aftur. Tað hevur Rigmor Dam, landsstýriskvinna í mentamálum, tikið avgerð um.
Hon hevur lagt uppskot fyri Løgtingið um at lækka inntøkumarkið fyri, hvussu nógv lesandi kunnu forvinna, uttan at missa studning, úr 20.000 krónum um mánaðin, niður í 15.000 krónur um mánaðin.
Síðani hava atfinningingarnar heglaðar niður yvir uppskotið og tær hevur hon nú tikið til sín.
- Tað er umráðandi at lurta, og tað havi eg gjørt í hesum førinum, sigur Rigmor Dam í tíðindaskrivi beint nú.
- Vit skulu virða lestur sum eitt fulltíðarstarv. Kortini eiga broytingar í inntøkumarkinum heldur at verða framdar í sambandi við onnur átøk, sum samstundis bøta um umstøðurnar hjá lesandi, og serliga hjá lesandi við børnum, heldur landsstýriskvinnan í mentamálum.
Samgongan hevur sett sær fyri at hækka lestrarstuðulin, at byggja bíligar lestraríbúðir og at lata lestrarstuðul allar 12 mánaðirnar av árinum.
- Fyrsta fyritreyt er kortini at koma upp á slætt búskaparliga, sigur Rigmor Dam.
Annars ætlar samgongan at seta tiltøk í verk, so at mong ung og lesandi, og lesandi við børnum, fáa fíggjarligar lættar komandi tíðina.
- Átøk sum skattalætti til lág- og miðallønt, familjuískoyti til fíggjarliga sperdar barnafamiljur, broytingarnar í kringvarpsgjaldinum fara veruliga at muna.
- Men kortini ásanna vit, at í løtuni er óheppið at lækka inntøkumarkið fyri at finna eina sparing á 1,5 mió. kr., sigur landsstýriskvinnan.
