Ikki fyrr enn týsdagin - tá tingfundur nummar 65 síðani hann seinast hevði farloyvi skuldi haldast, var neyðugt at fáa varamannin inn.
- Eg boðaði beinanvegin frá, tá eg varð valdur í Fólkatingið, at er fór at taka farloyvi frá løgtingstingarbeiðinum í tann mun tað fall saman við arbeiðinum í Fólkatinginum. Og tað hevur í langa tíð ikki verið neyðugt at fingið farloyvi, tí tað hevur væl borið til at røkt bæði størvini, sigur Høgni Hoydal.
Hann vísur aftur, at tinglimir hjá Tjóðveldi nú binda um heilan fingur og biðja um farloyvi, fyri at viga upp ímóti øðrum førum, har tinglimir hava verið burtur uttan at fáa næsta fólk á listanum inn fyri seg.
Í løtuni eru bæði Páll á Reynatúgvu og Heidi Petersen á tingi, tí bæði Høgni Hoydal og Torbjørn Jacobsen eru burturstaddir. Høgni Hoydal á Fólkatingi og Torbjørn Jacobsen í ørindum fyri Runavíkar kommunu sum havnarmeistari. Hann er til cruise-stevnu í franska býnum Cannes.
Tá Høgni Hoydal var landsstýrismaður í CHE samgonguni í 2008, røkti Sjúrður Skaale fólkatingsarbeiðið fyri hann. Tá segði Sjúrður Skaale, at tað ber ikki til at røkja løgtings- og fólkatingsarbeiðið samstundis, og hann legði tí løgtingsessin frá sær alla tíðina, hann var í Fólkatinginum.
