Í kvøld vóru Teis Horn Rasmussen og liðfelagarnir í Follo og spældu toppdyst móti oddaliðnum í næstbestu norsku hondbóltsdeildini, Viking TIF á útivølli.
Follo var leingi væl við í dystinum. Í steðginum var støðan javnleikur 16-16, og tá 49 minuttir vóru farnir var støðan javnleikur 24-24. Men seinastu løtuna vísti Viking TIF hví teir eru greitt oddalið í deildini. Viking TIF skoraði seks mál seinastu løtuna, meðan Follo bert megnaði at skora tvey mál. Endin var, at Viking TIF vann dystin 30-26.
Teis gjørdist næstbesti málskjúttin hjá Follo við fimm málum.
Follo er triðfremst í deildini við 18 stigum. Viking TIF er greitt oddalið við 26 stigum fyri 13 dystir.
Follo spælir dyst aftur 18. januar. Tá spæla teir móti Ros á útivølli.
Í bestu norsku hondbóltsdeildini tapti Kristiansand 21-29 (9-14) fyri Runar á heimavølli. Helgi H. Hoydal er uttanfyri við skaða, og Pauli Mittún var sjúkur, so Kristiansand mátti klára seg uttan sínar føroysku landsliðsleikarar í kvøld.
Kristiansand spælir grannauppgerð móti Arendal á útivølli 21. desember. Eftir tað verður ikki spælt aftur fyrrenn fyrst í februar, tí norska manslandsliðið skal taka lut í HM-endaspælinum í Svøríki og í Pólandi í januar.
