Fótbóltur
Fríggjadagin tók KÍ nýtt fet mótvegis visjón 2009 hjá felagnum. Ein visjón, har málsetningurin púra greitt er, at KÍ um trý ár skal vera fremsta fótbóltsfelag í landinum.
Tað eru Eyðun Klakstein, ungdómsvenjari, og Tony Paris, høvuðsvenjari, sum standa á odda fyri átakinum, sum fevnir um dreingir í aldrinum 12-16 ár. Við støði í eini heildarmeting av fótbóltsligu dygdunum verða spælararnir valdir út til hópin, sum ætlandi skal telja 16 spælarar, sum kanska kunnu vera við til at manna eitt framtíðar KÍ-lið í fremstu røð.
Vit stíla høgt við teimum ungu spælarunum í felagnum, og vit vilja gjarna gera nakað eyka fyri teir. Talentvenjingin skal vera eitt nýtt tilboð til teir bestu spælararnar, og hetta skal verða nakað, sum allir spælararar í felagnum skulu stremba eftir at verða við í, sigur Eyðun Klakstein.
Og Tony Paris er ikki ósamdur í hesum.
KÍ hevur sera nógvar góðar ungar spælarar, og vit vilja gjarna hjálpa teimum at menna seg enn meira. Vit hava tilboðið, og um spælararnir hava viljan og hugburðin, so kunnu vit í felag koma langt, sigur høvuðsvenjarin í felagnum.
