Í dag verður níggjunda og næstsíðsta umfar í landskappingini í talvi. Í øllum deildum valdar spenningur, tí stutt er millum oddaliðini. Í fremstu deildini tykist Havnar Telvingarfelag kortini at hava góðar møguleikar at endurvinna meistaraheitið. Fyri dystirnar í dag eru teir trý stig undan harðastu kappingarneytunum.
Sandavágur bjóðar av
Sandavágsmenn vunnu í fríggjakvøldið útsetta dystin í áttanda umfari móti Klaksvíkar Talvfelag 3-1. Høgni Egilstoft Nielsen og Bernhard Augustinussen vunnu á ávikavist 2.-, og 4. borði á Rana Nolsøe og Janusi Skaale, meðan Rógvi Egilstoft Nielsen og Ólavur Simonsen á 1. borði, og Torkil Nielsen og Steintór Rasmussen á 3. borði telvaðu javnt.
Havnarmenn vunnu farna sunnudag 4-0 á gøtumonnum. Helgi Dam Ziska, Martin Poulsen, Sjúrður Thorsteinsson og Carl Eli Samuelsen vunnu á Reinhold Isaksen, Jákup F. Joensen, Petur Páll Mikkelsen og Tórhall Thomsen. Í triðja dystinum vann annað lið hjá Havnini tepurt á kollfirðingum.
Úrslitini í 1. deild í 8. umfari:
Gøta - Havnin 0-4
Sandavágur - Klaksvík 3-1
Kollafjørður - Havnin B 1½ - 2½
Støðan í 1. deild:
Havnin 26½
Sandavágur 23½
Klaksvík 19
Havnin 2 13½
Kollafjørður 9
Gøta 4½
Í 2. deild er hørð kapping um uppflyting millum Klaksvík, Sandavág og Vestmanna. Klaksvíkar Talvfelag hevur 20½ stig, Sanadvágur 20 og Vestmanna 19. Innanhýsis dystir millum odaliðini eru eftir bæði í morgin og í síðsta umfari. Í 3. deild eru eisini trý lið við í oddanum. Streymur er fremst og hevur 21½ stig, Tofta Talvfelag hevur 19½ og Sandavágur 18½.
Telvað verður í øllum deildum í dag. Dystirnir í 1. deild verða hesir: Havnin - Klaksvík, Kollafjørður - Sandavágur og Gøta - Havnin 2.
Helgi Dam Ziska, sum telvar í Íslandi hetta vikuskiftið, verður ikki við í dystinum móti klaksvíkingum, tí ræður um hjá vágamonnum móti kollfirðingum at royna at ota seg eitt sindur fram á oddaliðið fyri tann avgerandi sínamillum dystin í seinasta umfari.
Síðsta umfar í landskappingini í talvi verður leygardagin 17. mars.
