– Eg haldi, at vit hava rakt okkara form øgiliga væl, og kanska hava kollfirðingar rakt sín eitt sindur ov tíðliga. Teir hava so øgiliga leingi bíðað eftir, hvørjum teir skulu spæla ímóti í finalunum, og tað vísir seg, at tú skalt gera okkurt serligt fyri at halda teg í toppinum, tá so er, staðfestir málverjin hjá H71, Jens Skipagøta.
– Tá tað so er sagt, so taki eg so ótrúliga synd í kollfirðingum. Hetta hevur verið eitt fantastiskt kappingarár hjá teimum, og eg hevði unt teimum at vunnið, sjálvt um eg nú taki steypið við mær suður.
Jens var ein av teimum, ið takkaði fyri seg eftir meistaraheitið í 2009, men valdi allíkavæl at halda fram, tí felagið hevði trot á málmonnum, og tað iðrar hann seg sjálvandi ikki um nú:
– Hetta hevur verið super. Fyri mítt viðkomandi má eg siga, at tað fyrra meistaraheitið var øgiligt, men at hetta hevur ikki minni týdning. Tað er kanska serliga, tí dystirnir hava verið, sum teir hava verið, sigur hann.
– Hetta hevur verið uppslítandi og heilt fantastiskt, alt í einum. Tú kanst ikki ynskja tær meira, enn tríggjar sovorðnar dystir. Kropsliga eri eg kanska ikki so móður, men mentalt hevur hetta verið møðsamt.
