USA váttar í dag, at tað var Ísrael, sum framdi álopið í libanska høvuðsstaðnum, sum beindi fyri næstovastanum hjá Hamas, Salah al-Arouri.
Hetta sigur ein kelda í amerikansku verjuni, sum tíðindastovan AFP endurgevur.
Bæði Libanon og Hizbollah, sum er virkin hernaðarligur felagsskapur í Libanon, hava peikað á Ísrael, men Ísrael hevur hvørki váttað ella avsannað tíðindini um álopið.
Aftur í dag bera útlendskir miðlar tíðindi um nýggj álop har suðuri í Libanon.
- Talan skal vera um ísraelsk álop, og sagt verður, at tilsamans níggju Hizbollah-limir eru dripnir, veit tíðindastovan, Reuters, at siga.
##med2##
Ovasti leiðarin í Hizbollah, Hassan Nasrallah, sigur, at um Ísrael førir kríggj móti Libanon, eru eingi mørk fyri, hvussu Hizbollah vil stríðast.
Hann kallar drápið av Saleh al-Arouri fyri eitt stórt og vandamikið brotsverk, sum Hizbollah ikki letur fara aftur við borðinum.
- Eitt kríggj móti okkum verður ógvuliga kostnaðarmikið. Ein og hvør, sum førir kríggj móti Libanon, kemur at angra tað, sigur Hassan Nasrallah.
