Tað spældi væl av hjá teimum úr Klaksvík

Tað var fult umfar í Betri deildini hjá kvinnum í dag, og tað lagaði seg væl hjá KÍ, sum er ósigrað topplið í sera spennandi kapping. Annað er, at tær úr Klaksvík vunnu trivaligan sigur, og hitt er, at allir avbjóðararnir í spennandi kappingini um FM spældu javnt.

Tað hevur verri enn so gingið so væl at skora mál hjá KÍ í ár, sum tað plagar at gera, og soleiðis var tað eisini leingi ídag.

KÍ var aftanfyri í Sørvági inntil miðskeiðis í seinna hálvleiki. Bettieyð Ellingsgaard legði 07 Vestur á odda, tá ið stórt korter var farið, og tað eydnaðist ikki favorittunum úr Klaksvík at javna fyrr enn í 67. minutti. Malena Olsen javnaði, og so glapp tað hjá KÍ, sum síðstu 18 minuttirnar skoraði fýra mál. Innskifta Eyðvør Klakstein legði KÍ framum 2-1, níggju minuttir seinni økti Tóra Mohr um munin til 3-1, og í síðstu løtu øktu Jórun Najma Patawary og Malena Josephsen um munin til 5-1.

KÍ er topplið við 23 stigum, og á næstu plássunum eru EBS/Skála við 21 stigum, NSÍ við 20 stigum, HB við 18 stigum og Víkingur við 17 stigum.

Í Gundadali endaði tað 1-1 millum HB og Víking. Bæði málini vórðu skorað í fyrra hálvleiki, og tað eydnaðist ikki HB at fáa nyttu úr, at HB í meiri enn ein hálvan tíma spældi 11 ímóti 10, tí landsliðsspælarin á miðvøllinum hjá Víkingi, Jensa Tórolvsdóttir, í 56. minutti sá reyða kortið.

Eisini við Margáir, har EBS/Skála hevði vitjan av NSÍ, endaði tað 1-1. NSÍ var frammanfyri, tá ið tað var hálvleikt, men eitt lítið korter eftir steðgin vóru tær í NSÍ so óhepnar at gera sjálvmál, og so endaði tað 1-1.

Hóast tað var farin meiri enn ein hálvur tími, tá ið B36 fekk hol á ímóti AB/B71, sum átti heimavøll á Argjum, so vann B36 tryggan 3-1 sigur. Heimaliðið pyntaði um, tá ið tað restaðu fýra minuttir.

EBS/Skála – NSÍ 1-1 (0-1)

0-1: Maria Vinjardsdóttir Johansen 36.

1-1: Sjálvmál 58.

07 Vestur – KÍ 1-5 (1-0)

1-0: Bettieyð Ellingsgaard 16.

1-1: Malena Olsen 67.

1-2: Eyðvør Klakstein 72.

1-3: Tóra Mohr 81.

1-4: Jórun Najma Patawary 89.

1-5: Malena Josephsen 94.

HB – Víkingur 1-1 (1-1)

0-1: Hanna Isaksen Højgaard 16.

1-1: Sara Samson Lamhauge 44.

AB/B71 – B36 1-3 (0-1)

0-1: Bára S. Magnussen 33.

0-2: Jacoba Langgaard br 58.

0-3: Victoria Ottarsdóttir í Funningsstovu 63.

1-3: Sjálvmál 86.

Máltindurin

Heidi Sevdal NSÍ              14

Hervør Olsen KÍ               13

Lea Lisberg EBS/Skála     11

13. umfar

Leygardagin 7. august

EBS/Skála – HB

07 Vestur – Víkingur

B36 – NSÍ

AB/B71 – KÍ