Soleiðis sum tað hevur gingið seinastu vikurnar var tað einki forgjørt at rokna við, at 07 Vestur á heimavølli og í góðveðrinum fór at vinna trygt ímóti B71. At B71 fyrr í ár tapti tepurt 1-0 á heimavølli ímóti 07 Vestur, kundi kanska boða frá, at tað ikki var víst, at sandoyingar fóru at leggja rygg til stórtap.
Tá ið dómarin bríkslaði fyri síðstu ferð, vísti talvan 3-1. Eftir fyrra hálvleik var 1-1.
Miðvallarin Martin Tausen setti eftir lítlan hálvan tíma hol á fyri heimaliðið, tá ið hann eftir innlegg og við høvdinum setti bóltin í málið.
Seks minuttir undan steðginum javnaði Ihrahima Camara, tá ið hann eftir langt innkast og eitt sindur av aftur og fram var knappur og við fremra stólpa smekkaði bóltin í málið.
Tíggju minuttir eftir steðgin var tað liðformaðurin Gunleif Magnusarson, sum legði 07 Vestur framum aftur. Torstein Mýlingstind legði innfyri, og Gunleif Magnusarson setti við høvdinum bóltin í málið og so var 2-1.
Heimaliðið hevði leikliga yvirvág og fleiri góðar málmøguleikar. Tað var tó leingi spennandi, tí gestirnir vóru onkra ferðina framvið í mótálopum. Tá ið tað restaðu fimm minuttir, var tað Holgar Durhuus, sum staðfesti 3-1 heimasigurin. Gunleif Magnusarson lyfti bóltin framum verjuna, og so rann Holgar frá mótstøðumonnunum, og tað eydnaðist honum at lyfta bóltin upp um Klæmint Olsen í B71 málinum og í málið.
07 Vestur er á øðrum plássi við 44 stigum og sekstan stig frammanfyri FC Suðuroy á triðja plássi og trý stig aftanfyri EB/Streym á fremsta plássi. Leygardagin fer 07 Vestur at spæla á útivølli ímóti HB.
B71 rundar av undan summarsteðginum, tá ið NSÍ leygardagin fer at vitja á Sandi.
