Havnin fær hernaðarliga vitjan seinnapartin, tá eitt hernaðarskip og ein kavbátur hjá týska herinum leggja at við Molan.
Kavbáturin og hernaðarskipið eru í løtuni sunnanfyri Vágar við kós móti Havnini, har tey eftir ætlan koma um fimm tíðina seinnapart. Tað upplýsir vakthavandi í Tórshavnar Havn.
Týska hernaðarskipið Main er 101 metrar langt og 16 metrar breitt og er bygt í 1974. Kavbáturin, við heitinum U32, er 57 metrar langur og 7 metrar breiður, og varð tikin í brúk í 2005.
Sambært heimasíðuni Marine Traffic, so er hernaðarskipið á veg aftur til Týsklands eftir at hava verið í Íslandi.
