Tvey umfør eru eftir í 1. deild hjá kvinnum, men sunnudagin gjørdist greitt, at KÍ fær gullið og AB silvurið, eftir at KÍ í síðsta innanhýsis dystinum teirra millum vann 2-1 og er 11 stig framman fyri argjakvinnur, nú bara hesi síðstu seks stigini eru eftir at spæla um.
Greitt var undan kvinnudystinum við Djúpumýri í Klaksvík millum tey bæði fremstu liðini, at alt kundi verða avgjørt, og í veruleikanum var tað nóg mikið hjá KÍ at fáa eitt stig, so var føroyameistaraheitið fingið til høldar. Tað sá tó einki út hjá KÍ fyrstu trý korterini, tí spælið hekk illa saman, men beint fyri hálvleik fekk Eyðvør Klakstein úr eitt sindur spískum sent bóltin upp í nettakið.
Seinna málið hjá KÍ kom ikki, fyrr enn bara tveir minuttir vóru eftir, men so mikið meira avgerandi var tað, tí við hesum lukkaði KÍ dystin. Rannvá B. Andreasen sendi við hælinum bóltin fram við AB-málverjanum og í málið til 2-0, og samstundis var hetta mál nummar 501 hjá Rannvá í bestu kvinnudeildini.
Ein minutt seinni eydnaðist Elsu Splidt Jacobsen at minka um munin fyri AB, tá hon smekkaði til, og bólturin umvegis ein KÍ-ara fór í einum boga upp um málverjan og í málið. Harvið kundi verða staðfest, at KÍ hevur vunnið gull í bæði lands- og steypakappingini í ár, og í báðum førum er tað AB, ið hevur fingið silvurið.
Fýra við øll árini
Samstundis er talan um søguligt gull til KÍ, tí hetta er tólvta árið á rað, at klaksvíkskvinnur eru føroyameistarar, og ta sigursrøðina er eingin í føroyskum fótbólti í nánd av at bróta tey næstu mongu árini. Bara tað er í sjálvum sær eitt ivaleysa stórt roysni, men eisini í altjóða høpi er tað sera sjáldsamt, at eitt lið megnar at vinna meistaraheitið so ofta á rað.
– Tað er vónleyst at taka dagar ímillum, hvør av hesum 12 árgangunum hevur verið tann besti, tí tað hevur verið eitt sindur upp og niður. Okkurt árið hava vit verið øgiliga góðar, men okkurt annað árið hevur tað verið meira spennandi, sigur Rannvá B. Andreasen, ið saman við Malenu Josephsen, Elsu Mariu Simonsen og Paulu Mikkelsen hevur verið við til at vunnið øll 12 meistaraheitini.
– Fyri okkum kann tað allíkavæl gera tað sama, um vit eru nógv fremst ella ikki, so leingi sum vit bara eru fremst, tá avtornar. Í ár hava vit havt nógvar spælarar, sum hava verið øgiliga góðir, so vit hava í øllum førum eina ljósa framtíð. Tær, sum eru yngri, hava sæð okkum vunnið øll hesi árini, so tað smittar niður ígjøgnum rekkjurnar. Henda vinnaramentalitetin, vit hava fingið á kvinnusíðuni í Klaksvík, mugu vit halda fast við.
Enn hava KÍ-kvinnurnar tveir dystir eftir av kappingini, og Rannvá B. Andreasen væntar, at tá kanska tær fáa kjansin, sum hava sitið nógv á bonkinum, men framvegis verður málið at vinna eisini teir báðar síðstu dystirnar.
Síðani í mars hava kvinnurnar hjá KÍ vant tríggjar ferðir hvørja viku, men nú kappingin endar, halda tær frí frá fótbólti, til kappingin byrjar aftur í mars næsta ár.
