Oliver Jufer varð tikin har norðuri í Teilandi tann 5. desember. Hann var drukkin og hevði í fyllskapi oyðilagt tvær myndir av teilendska konginum, Bhumibol.
Tað skuldi hann ikki havt gjørt. Bhumibol, sum hevur verið kongur í Teilandi seinastu seksti árini, er ikki bara kongur, men sambært teilendskari siðvenju næsti maður Guði, og í grundlógini stendur beinleiðis, at ongum er loyvt at niðra kong.
Tað gjørdi tann 57 ára gamli Oliver Jufer, og sambært lógini kann hann fáa upp í 75 ára fongsul. So harða revsing fær hann ikki, tí hann hevur játtað seg sekan, men verji hansara sigur við Reuters, at Oliver Jufer sleppur ikki undan fongsulsrevsing.
Dómur fellur í málinum 29. mars.
