Landsliðið hjá Aserbadjan hevur havt sín tíðindafund undan Nations League landsdystinum móti Føroyum, sum verður í morgin klokkan 17. Venjarin hjá Aserbadjan, Gurban Gurbanov, roynir at siga sum minst.
- Eg vil ikki siga so nógv. Vit brúka okkara orku upp á at fyrieika okkum til dystin í morgin, har vit vóna at fáa eitt gott úrslit, sigur Gurban Gurbanov.
Hann bleiv eisini spurdur um, hvussu tað ber til at Aserbadjan fær betri úrslit á útivølli enn á heimavølli.
- Tað er positivt, at vit fáa betri úrslit á útivølli, men eg veit ikki heilt hví tað er so. Kanska spæla hini liðini meiri álopskent á heimavølli, so tað er lættari okkum at revsa tey. Tá tey spæla á útivølli, so leggja tey meiri fyri í verjustøðu. Tá verður torførari at brót tey niður. Vit hava tó eina vón um, at tað fer at eydnast í morgin móti Føroyum, sigur Gurban Gurbanov.
Aserbadjan hevur framvegis møguleikan at koma víðari úr bólkinum, men helst krevur tað ein sigur á Føroyum í morgin.
