Akkersketans frá einum av akkerunum hjá boripallinum gleið út í annað borðið og holvdi skipið. Tað er í hvussu er tann frágreiðingin, sum tykist mest sannlík sambært tí, sum teir sjey, ið sluppu livandi frá vanlukkuni, hava greitt frá.
?Bourbon Dolphin? skuldi flyta eitt av akkerunum hjá boripallinum Transocean Rather. Ketan lá um eina rullu afturi á reyv, men gleið út í annað borðið við tí úrsliti, at skipið holvdist.
Norska stjórnin kunngjørdi í dag, at hon fer at seta eina serliga nevnd at kanna vanlukkuna.
Bretska bjargingartænastan kunngjørdi í kvøld, at nú eru at kalla ongar vónir um, at teir fimm menninir, sum ikki eru komnir afturíaftur, eru á lívi.
