Hetta málið er sera sera løgið. At eitt fakfelag – stuðlað av Samtaki, soleiðis ger seg inn á tey mest grundleggjandi rættindi, sum eitt starvsfólk hevur, í hesum føri skrivarin í Fiskimannafelagnum, líkist í øllum førum ikki virðiligum fakfelagspolitikki – hetta er akkurát tað, sum er andsøgnin til eksistensin hjá fakfeløgunum.
Men í gjár kom so umberingin frá Fiskimannafelagnum. Og hon er soljóðandi:
»Nevnd og formaður í Føroya Fiskimannafelag vátta, at fyrrverandi skrivstovumaður felagsins gjørdi eitt gott arbeiði fyri felagið, og hevði stóra vitan á sínum øki.
Vit muga ásanna, at mannagongdin í samband við burturvísingina ikki var røtt og skuldi ikki verið so.
Vit harmast um, at hetta hevur elvt til, at Olaf Johansen er settur í ringt ljós millum manna. Vit vilja við hesum biða Olaf og hansara avvarðandi um umberðing fyri tað, tey hava verið ígjøgnum.
Vit takka Olaf fyri 35 ára starvstíð í Fiskimannafelagnum.
Vit vilja við hesum skrivi vóna, at øll skriving og kjak um hetta mál fær ein enda, Fiskimannafelagnum at frama.«
Tað undrar okkum stórliga, at Samtak stuðlar slíkum fakfelagsskaðiligum virksemi - tá Fiskimannafelagið soleiðis etur allar ákærur í seg aftur.
