Tað er nógv grind í Norðstreymoy í løtuni.
Fyrst løgdu 266 hval beinini í Vestmanna seinnapartin í gjár, og í gjárkvøldið løgdu umleið 180 hval beinini í Leynum.
Seðlarnir í grindini í Vestmanna komu út á bryggjuni klokkan 07.30 í morgun, men í grindini í Leynum er ikki liðugt enn.
Fyri løtu síðan, tá vit frættu frá sýslumanninum, Kristian Martini Joensen, var hann júst steðgaður í Kvívík.
- Vit eru ikki lidnir at merkja grindina í Leynum enn, og tí kann eg ikki siga, hvussu nógv skinn eru her.
Hann sigur, at drápspartarnir í grindini í Vestmanna eru 1,5 skinn, og her verður grindin eisini býtt í heimapartar í grindaøkinum, sum er rættiliga víðfevnt.
- Tað eru kommunurnar, sum fáa tilboð um heimapartar, ið sjálvar taka sær av hesum, og vanligt er, at nakrir heilir hvalir verða koyrdir út í økið.
Tað eru nógvar hendur í sving, tá so nógvir hvalir leggja beinini, og her er stórt arbeiði, sum skal gerast.
Spurdur, um hann hevur blundað á náttini, sigur Kristian Martin Joensen, at tað hevur hann ikki.
##med2##
- Eg havi verið í sving síðan í gjár og í alla nátt, og nú standi eg í túninum her í Kvívík, sigur hann.
Onkur kommuna hevur longu í morgun boðað sínum borgarum frá, at tey fáa heimapartar frá grindini í Vestmanna, og millum hesar kommunur er Eiðis kommuna.
- Vit siga frá, tá hvalirnir verða her. Grindin verður skorin upp á havnalagnum, og heitt verður á fólk um at hjálpa til við, at skera upp, siga tey.
##med3##
