Svimjihøllin í Runavík verður bygd í norðrara enda av Bylgjuni, og her verða tvær lonir lagdar aftrat verandi bygningi.
- Stutt eftir, at avtalan millum Runavíkar kommunu og Kanjon um bygging av svimjihøll varð undirskrivað hin 27. okrober í fjør, fór Kanjon í gongd við arbeiðið, sum er mett at taka góð tvey ár.
Tað siga tey í Runavíkar kommunu í dag.
- Longu eina viku eftir undirskriving, var nógv virksemi í økinum og tey, sum ferðast her javnan, leggja til merkis, at her broytist skjótt.
Eftir innleiðandi fyrireikingar var fyrsta stigið at taka gamla millumbygningin niður.
- Kanningar tíðliga í tilgongdini vístu, at tann bygningurin, sum ikki bleiv renoveraður, tá Bylgjan varð útbygd við fimleikahøll í 2014, ikki hóskaði sum partur av nýggju svimjihøllini.
Næsta stigið var at grava omanav, og hetta arbeiðið er komið væl áleiðis. Í seinastuni er eisini sprongt í økinum.
- Djúpri endin av hylinum fer niður á fýra metra dýpi, og tí skal gravast nakað niður aftrat, áðrenn farast kann undir bygging av svimjihøllini, siga tey í Runavíkar kommunu í dag.
Á heimasíðuni - www.runavik.fo - verður við myndum víst á, hvussu nýggja svimjihøllin kemur at síggja út, og her er eisini neyvari kunning um verkætlanina.
- Higartil hevur arbeiðið við svimjihøllini gingið bæði skjótt og væl, og væntandi stendur høllin liðug á vári 2025, siga tey í Runavíkar kommunu í dag.
##med2##
