Tað verður ein av teimum heilt stóru innan nýggjan elektroniskan popp, sum fer at pumpa lív í fjøldina á Voxbotn 2015.
John Martin Lindstrøm ella bara John Martin, sum hann kallar seg, verður nevnliga millum nøvnini á palli.
Heimurin varðnaðist veruliga John Martin, tá hann saman við Swedish House Mafia drønaði upp eftir hittlistunum við sangum sum "Save The World”, “Reload” og ikki minst “Don't You Worry Child”. Men eisini samstarvið við enska rapparan Tinie Tempah við lagnum “Children of the Sun”, kláraði seg væl á hittlistunum í Onglandi.
Seinastu tíðina er størsta orkan brúkt til soloverkætlanina, har fyrsta staklagið undir navninum John Martin, “Anywhere for You”, hevur staðið seg sera væl í Onglandi. Tað hevur eisini verið nógv spælt her heima.
Í løtuni er ein heil fløga á trappuni, undir egnum navni. Hetta er stórur spenningur um, bæði í heimlandinum og í Onglandi.
Nú kemur hann við manning á Voxbotn, og tað er eingin ivi um, at hetta er ein harri, ið kann fáa fjøldina á kók.
Voxbotn 2015 verður í Vágsbotni leygardagin 27. juni.
