Tríggir av teimum fyrstu fýra dystunum hjá manslandsliðnum í EM-undankappingini, sum vóru spældir í heyst, endaðu við stórtapi. Ímóti Serbia heima og Russlandi úti taptu Føroyar við 21 málum, og millum teir báðar dystirnar taptu Føroyar á útivølli fyri Bosnia við 17 málum. Frægast gekst í síðsta dystinum ímóti Italia, har munurin »bara« var sjey mál.
Felags fyri Serbia, Russland og Bosnia var, at tey mestsum trumlaðu føroyska liðið niður, sum úrslitini eisini siga, meðan Italia ikki rættiliga hevði sama skjótleikan og somu styrkina, sum hini. Nú fimta liðið í bólkinum, Sveis, vitjar í Føroyum, er spurningurin, hvussu tað fer at ganga.
– Hesir spælararnir, í mun til hini liðini, vit hava spælt ímóti, eru ikki so øgiliga stórir og spæla ikki so øgiliga skjótan hondbólt. Eg vil siga, at teir kanska spæla eitt slag av hondbólti, ið hóskar eitt sindur betri til okkara spæl, sigur Dia Midjord, sum saman við Kára Nielsen er venjari hjá landsliðnum.
– Teir eru kanska eksplosivir, men koyra ikki so øgiliga skjótt fram eftir vøllinum og eru ikki so øgiliga skjótir heim, sum fleiri av hinum liðunum. Teir eru nokk so tungir á sær, men øgiliga sterkir, og eftir mínum tykki spæla teir eitt slag av hondbóltsspæli, ið hóskar okkum væl, tí okkara spælarar eru eisini nokk so kropsliga sterkir.
Heimligir spælarar
Um hugt verður at úrslitunum hjá Sveis higartil í hesi EM-undankappingini, hava úrslitini í trimum av teimum fýra dystum verið sera góð. Sveis vann við sjey málum á Italia, tapti við einum fyri Russlandi og spældi javnleik ímóti Serbia, áðrenn tað gjørdist eitt heilt annað úrslit ímóti Bosnia, sum vann við 11 málum.
Teir báðir landsliðsvenjararnir hava í sínum fyrireikingum hugt at, hvussu sveisiska liðið er mannað, og líkt er til, at talan er um fleiri royndar spælarar, men at teir flestu í dag eru at finna í heimligu kappingini í Sveis.
– Vit kunnu staðfesta, at Sveis hevur onkrar fínar frontfigurar á liðnum. Millum annað hava teir ein spælskipara, sum nú spælir í Sveis, men frá næsta kappingarári spælir við Bjerringbro í Danmark. Og so hava teir ein høgrabakk, sum millum annað hevur spælt í Spania, umframt at onkrir hava verið í Týsklandi eisini, sigur Dia Midjord.
– Men teir flestu hjá teimum spæla heima í Sveis og kanska einir tveir í øðrum londum. So teir eru kanska í somu støðu sum vit, tá tað kemur til útisetar, tí vit hava jú teir allarflestu av okkara spælarum í Føroyum og so bara ein ella tveir í Danmark.
-------------
Føroyski hópurin
Teir 14 spælararnir, 12 útispælarar og tveir málverjar, sum eru tiknir út til EM-undankappingardystin ímóti Sveis í ítróttarhøllini á Hálsi í kvøld klokkan 19.
VÍF
Agnar Joensen
Rúni Joensen
Sámal Joensen
Áki G. Olsen
Neistin
Finnur Hansson
Ingi Olsen
Karl Herup Olsen
H71
Regin Joensen
Levi Nybo (málverji)
Esbern Patursson
Kyndil
Hans Áki Dal-Christiansen
Bárður Johannesen
Ajax Keypmannahavn
Heini Hanusarson
ÍF Føroyar
Lars L. Black (málverji)
