Í kvøld skal Zinedine Zidane til tað, ið spanskir fjølmiðlar hava kallað sveinaroyndina hjá Real Madrid venjaranum. Eftir ein byrjan við fleiri glottum, so tykist tað sum, at bara Champions Legaue steypið kann bjarga honum.
Real Madrid skal venda einum 2-0 tapi í Wolfsburg í fjórðingsfinaluni í Champions League. Ger hann ikki tað, meta spanskir miðlar at Zinedine Zidane spælir sær av við møguleikan, sum venjari hjá Real Madrid í framtíðini.
Fekk takið á Cristiano Ronaldo
Kappingarárið hjá Real Madrid byrjaði við, at Rafael Benitez bleiv settur sum venjari. Tað fall ikki øllum í góða jørð, hóast hann er uppvaksin í felagnum. Verjukendi spælistílurin og vantandi evnini at strúka stjørnunum eftir hárinum, hevur fingið øði í bæði spælarar og viðhaldsfólk.
Um ársskiftið setti Real Madrid Zinedine Zidane sum venjara í staðin fyri Rafael Benitez, sum millum annað ikki fekk takið á stóru stjørnuma, Cristiano Ronaldo. Tað byrjaði væl og Cristiano Ronaldo tóktist taka væl móti nýggja venjaranum, sum somuleiðis hevur roynt at verið heimsins besti fótbóltsspælari.
Tað hevur tó ikki eydnast Zinedine Zidane at fáa takið á sponsku landskappingini, har liðið undan El Clasico uppgerðini var heili 10 stig aftanfyri Barcelona, og á einum triðja plássi. Real Madrid vann dystin og eina løtu sá út, at hetta kundi verða vendin.
Men tá Real Madrid fáa dagar seinni tapti 2-0 í Týsklandi fyri Wolfsburg, vóru fjølmiðlarnir aftur úti við rívuni. Søgan sigur, at Florentino Perez, forseti í Real Madrid, nú aftur vil hava José Mourinho sum venjara.
Zinedine Zidane hevur nú ein møguliga at bjarga sær eina framtíð sum venjari hjá Real Madrid. Kravið er ein samlaður sigur á Wolfsburg, sum kemur á vitjan á Santiago Bernabéu í kvøld.
Champions League 1/4 finalur:
Real Madrid (0) – (2) Wolfsburg (19:45)
Manchester City (2) – (2) PSG (19:45)
