20. oktober 2005 samtykti Føroya Løgting at seta nevnd, ið skuldi arbeiða fyri øktum kvinnuleikluti í politikki. Nevndin skuldi mannast við einum umboði fyri hvønn politiskan flokk, og einum umboði frá ávikavist Javnstøðunevndini, Kvinnufelagssamskipan Føroya, Føroya Kommunufelag og Kommunusamskipan Føroya.
Síðani varð nevndin mannað, soleiðis sum greitt er frá omanfyri.
1. januar 2006 varð málsøkið javnstøða flutt frá landsstýrismanninum í almanna- og heilsumálum til landsstýrismannin í vinnumálum.
Í skrivi, dagfest 6. februar 2006, boðaði løgmaður landsstýrismannin í vinnumálum frá, at valið av løgtingslimunum Lisbeth L. Petersen og John Johannessen ikki var í samsvari við § 8 í stýrisskipanarlógini. Landsstýrismaðurin varð tískil biðin at velja onnur umboð í nevndina.
Í skrivi, dagfest 17. februar 2006, heitti landsstýrismaðurin tí á ávikavist Sambandsflokkin og Javnaðarflokkin at skjóta upp onnur umboð í nevndina. Flokkarnir hava síðani valt onnur umboð.
Aftaná er vorðið greitt, at valið av varaumboð Tjóðveldisfloksins eisini er í stríð við ásetingina í § 8 í stýrisskipanarlógini, og er Tjóðveldisflokkurin tískil biðin um at skjóta upp annað umboð í nevndina. Tá Tjóðveldisflokkurin hevur valt annað umboð, fer landsstýrismaðurin at skipa nevndina.
