Stuðul til infrakervið í útoyggjum

Heðin Mortensen

Opið bræv til landsstýrismannin í vinnumálum, Bjarna Djurholm


Tann 1. januar 2006 kom løg­tingslóg nr. 137 frá 13. desember 2005 um at veita stuðul til íløgur á infra­kervið á útoyggjum í gildi. Henda lóg er framhald av løg­tings­lóg nr. 50 frá 10. apríl 2003 um at veita stuðul til infrakervið á útoyggjum, ið sam­bært egnum innihaldi fór úr gildi við árslok.
Fyrst av øllum vil Tórs­havn­ar kommuna gera vart við, at kommunan á ongan hátt tekur undir við framdu lógarbroytingini.
Harumframt er fram­ferðar­hátt­urin í hesum máli ikki nøktandi, tí kommunan, ið lógar­broytingin beinleiðis við­víkur, ikki er tikin við uppá ráð. Hetta er at vísa lítla virðing fyri teirri serligu støðu, kommunurnar eru í, umframt at hetta má metast at vera rættiliga óheppin háttur at fyrireika nýggjar lógir.
Gásadalur og Nólsoy eru ikki longur nevndar í lógini. Sambært viðmerkingunum til lógaruppskotið verður mett, at Gásadalur og Nóls­oy ikki eru útoyggjar sam­bært lógaruppskotinum, t.e. útoyggjar, sum liggja av­síðis við avmarkaðum ferða­sambandi og tænastum til borgaran.
Ein avleiðing av lógini, ið kom í gildi 1. januar 2006, er sostatt, at kommunurnar, ið varða av Gásadali og Nólsoy ikki longur kunnu søkja um stuðul til íløgur á infrakervið á hesum støðum. Hóast hetta er lógaruppskotið hvørki sent kommununum ella kommunufeløgunum til ummælis. Kommunurnar eru heldur ikki kunnaðar um broytingarnar, ið lógin hevur við sær.
Í almennu við­merking­un­um til lógaruppskotið stend­ur, at avleiðingarnar av uppskotinum fyri kommun­ur­nar eru, at útoyggjar, sum liggja avsíðis og hava av­markað ferðasamband og avmarkaðar tænastur til borgar­an, kunna søkja um stuð­ul til íløgur í infrakervið. Hó­ast ávísar kommunur ikki longur kunnu søkja henda stuðul, er hetta ikki upp­lýst sum ein avleiðing av lógar­upp­skotinum.
Tórshavnar kommuna hev­ur m.a. heft seg við, at eftir lógini frá 2003 kom Kals­oyggin bara undir lóg­ina, tá tað ræður um íløg­ur í samskiftiskervið, men nú arbeiðið at gera sam­ferðslu­havn­ina á Syðradali varð lið­ugt í 2005, er Kalsoyggin fevnd av lógini á jøvnum føti við aðrar sokallaðar útoyggjar.
Ilt at sígga nakran prinsip­iellan mun á Nólsoynni og Kalsoynni, tí báðar liggja nakað frá størru oyggjum ella meginøki. Verður hugt at ferðasambandi og tæn­astum til borgarar, ið búgva á hesum oyggjum, ber somuleiðis illa til at siga, at onnur oyggin liggur meira avsíðis, hevur meira avmarkað ferðasamband ella færri tænastur til borgaran, tí á fjarstøðu til meginøkið og títtleika á ferðasambandi er at kalla eingin munur. Ein­asti munurin er, at onn­ur oyggin hoyrir til høvuðs­­staðarkommununa, með­an annar parturin av Kals­oynni hoyrir til Klaks­vík­ar kommunu, og hin er sjálvstøðug kommuna. Tórs­havnar kommuna undrast tí á gjørdu broytingarnar.
Sum nevnt tekur Tórs­havn­ar kommuna ikki undir við framdu lógarbroytingini, tá henda ikki viðger sam­bæriligar oyggjar líka. Tí verð­ur staðiliga heitt á Vinnu­málaráðið um at taka málið upp aftur og saman við kommununum viðgera spurn­ingin um, hvørjar oyggjar skulu koma undir lógina og ikki.
Tórshavnar kommuna vón­ar at enda, at framtíðar lógar­broyt­ingar ikki verða framdar yvir høvdið á kommununum eins og í hesum máli, men at Vinnumálaráðið sjálvsagt send­ir kommun unum ella kommunufeløgunum lógar­upp­skot til ummælis, tá hesi hava avleið ingar fyri kommunurnar.
Umframt at kommunan gong­ur út frá, at henda manna­gongdin ikki kemur fyri aftur, verður við hesum heitt á tygum um at taka málið uppaftur og saman við kommun­unum at viðgera spurn­ingin um, hvørjar oyggjar skulu koma undir lógina og ikki. Tórshavnar kommuna er altíð til reiðar at koma á fund um málið.
(Avrit av hesum brævi er eisini sent løgtingslimunum í Suðurstreymoy og fjøl­miðlunum).

hedin@torshavn.fo