Maðurin, sum hevur longt sáttmálan við Liverpool, er stríðsmaðurin Jon Flanagan, ið er 23 ára gamal. Hetta váttar almenna heimasíðan hjá Liverpool. Sáttmálin varð undirskrivaður fyrr í dag, men tó hevur Liverpool ikki upplýst, hvussu nógv ár nýggi sáttmálin fevnir um.
Jon Flanagan er bakkur, ið fyri tað mesta hevur spælt á vinstra bakki, hóast hann er høgra beintur. Flanagan fekk sítt veruliga gjøgnumbrot í kappingarárinum 2013/2014, tá ið hann vann sær fast pláss á vinstra bakki á tí Liverpool-liðnum, sum var á markinum at vinna Premier League tað árið.
Bakkurin hevur tó verið ógvuliga skaðadarvaður síðani hetta kappingarárið, og í fjør spældi hann ikki ein einasta dyst í Premier League. Tað var ikki fyrr enn í januar í ár, at Flanagan aftur var at síggja í dysti hjá Liverpool, og hevði hann tá verið skaddur í heili 20 mánaðir.
- Hetta er mín triði sáttmáli við felagið. Síðani eg var barn hevur tað verið mín dreymur at umboða Liverpool, so hetta er frálíkt, sigur Jon Flanagan í samrøðu við heimasíðuna hjá Liverpool.
Jon Flanagan hevur tilsamans spælt 47 dystir fyri Liverpool.
