Jón Brian Hvidtfeldt/ Ingolf S. Olsen
------
Hvørki Jørgen Holme, stjóri, Niels Mortensen, nevndarformaður, ella Johan Dahl, vinnumálaráðharri, sum umboðar høvuðspartaeigaran – landið – vilja siga nakað ítøkiligt um, hvat teir sjálvir halda eigur at verða framtíðarkósin hjá Atlantsflog. Teir vilja allir bíða, til arbeiðið at gera og orða nýggja strategi er liðugt.
Í einari langari samrøðu í nýggja vinnublaðnum VINNA hjá Sosialinum segði Jørgen Holme tó fríggjadagin eitt sindur um, hví hann sum nýggjur skipari í stýrihúsinum hjá føroyska tjóðarflogfelagnum enn stendur á fráfaringarbreytini, tá høvuðsargumentið fyri stjóraskiftinum í Atlantsflog í november í fjør júst var tørvurin á nýggjari strategi.
– Men nú verður farið á flog og strategiin orðað, lovar Jørgen Holme, stjóri í Atlantsflog.
At hjálpa sær við strategiarbeiðnum hevur Jørgen Holme leitað sær hjálp úr Skandinavia. Tað er ráðgevingarfyritøkan Quartz+Co við skrivstovum í Keypmannahavn, Oslo og Stockholm, sum hevur fingið litið í hendi at hjálpa føroyska tjóðarflogfelagnum at leggja nýggju strategiina.
– Eg eri sannførdur um, at fyritøkan hevur nakrar góðar førleikar og sterk amboð til at leiða okkum skjótt og gott ígjøgnum tilgongdina, sigur Jørgen Holme. Aðalfundur verður í Atlantsflog 3. apríl. Men partaeigarar og onnur áhugað skulu ikki rokna við, at nøkur liðug framtíðarloysn liggur á borðinum tá.
– Nei, arbeiðið verður ikki liðugt til aðalfundin, staðfestir Jørgen Holme og heldur
fram:
– Strategiarbeiðið byrjar hálvan februar, og so koyra vit á til tíðliga í summar. Arbeiðið skal vera liðugt um miðjan juni, og tá skulu vit hava eina nýggja strategi fyri felagið, sigur Jørgen
Holme.
