Á býráðsfundi hósdagin hin 28. november varð fíggjarætlanin hjá Eysturkommunu fyri 2025 einmælt samtykt. Býráðið hevur síðan í heyst viðgjørt fíggjarætlanina.
Inntøkan fyri 2025 er mett til 143,6 milliónir krónur. Skattaprosentið verður eins í ár 19,9, og barnafrádrátturin verður eisini óbroyttur, 9.000 krónur fyri hvørt barnið.
Samlaðu rakstrarútreiðslurnar hjá Eysturkommunu í 2025 eru mettar til 122,3 milliónir, har serliga kjarnuuppgávurnar eru høgt raðfestar og eru umleið helmingurin av rakstrarjáttanini.
Kjarnuuppgávurnar eru eitt nú barnaansing og eldrarøkt.
- Sum nakað nýtt, er peningur settur av til køkshjálp á ansingarøkinum, og kemur hetta at verða sett í verk skjótast gjørligt í 2025.
Í Eysturkommunu vita tey at siga, at 64 milliónir krónur eru settar av til íløgur í 2025, og umleið hemingurin av hesum er settur av til ætlaðu skúlaútbyggingina í Leirvík.
- Ein onnur verkætlanan, sum arbeitt hevur verið við í hesari setuni, er útstykking í Syðrugøtu. Henda verkætlanin skal eisini fremjast, og peningur er settur av til at fara undir hana sum skjótast.
Verkætlanin við Tjørnunes fekk byggiloyvi fyrst í november mánaði.
- Lendiskeypið varð framt fyri trimum árum síðan og fer verkætlanin eftir ætlan í gongd í næstum. Tískil er peningur eisini settur av til hesa verkætlan í komandi ári.
Lagt verður aftrat, at miðstøðin hjá Nánd, sum er eldrasamstarvið millum Eysturkommunu og Fuglafjarðar kommunu, skal uppraðfestast.
- Her er peningur settur av til at fáa miðhæddina setta í stand, soleiðis at heimatænastan hjá Nánd fær betri umstøður til sítt arbeiði.
Í Eysturkommunu siga tey, at smærri fríðkanarverkætlanir eisini eru raðfestar í fíggjarætlanini, og meira verður at frætta um hesar seinni.
##med2##
